Var ustacılar, angıları kendi canını koyȇrlar herbir kendi işinä. Çadır kasabasından el ustacısının Abdula Elenanın kolekţiyasında var peşkirlär hem dorojkalar. Ona deyni el işleri o diil sade zanaat, ama onun yaşaması.
Çadır kasabasından el ustacısı Elena Abdula ilk keret aldı iineyi elinä küçükkän. İlkin dikişlär materiya parçalarında diildilär uz, ama sora rubalar kendinä hem hısımnara deyni dikmää çeketti. Vakıtlan havezlik dikmää geçti ustacılıya. Terziyka söleer, ani türlü materiyalardan var nasıl diksin ölä ruba, angısı gösterecek insanın harakterini.
«Benim canım acȇr, ani gençlär fistan giimerlär. Pek beenerim fistan giisinnär. O düzer insanı, yapȇr onu taa gözäl. Açan kız giimni fistannan taa ii olȇr. Terzilik uurunda işledim, terzi hem zakroyşik. Diktim çok. Bän beenärdim ölä fasonnarı dikmää, angıları bana meraklı yapmaa, hem hazır rubayı görmää»,- dedi usta.
Elena Abdula için dikmäk o iş, angısı getirer hem ona hem başka insannara da sevinmelik. Herbir ruba- ayırı bir istoriya. Ona canını koymaa — o başlamaa insana diil sade gözäl giiyim, ama islää kef tä, söleer Elena: «Bana, açan insan gelärdi da materiyayı gösterärdi bän görärdim şansora hazır rubayı da söläärdim, ani görerim bir fasonu, angısı yakışıklı insana olacek.Peşkir herzaman insannan yanında- duumasından büük yortularadan, onda büük kuvet var – o birleştirer şindiki hem geçmiş zamannarı», —söleer Elena Dmitrievna.
O evelki peşkirleri koruyȇr. Onun kolekţiyasında var geçän asirdän kalma düün peşkiri, angısını taa onun malisi dokudu.
«Bu goda peşkiri, onu mali bürüncüktän dokudu. Kendilieri bürüncülüü da çekärmişlär, hepsini kendileri. Tanteli iiniylän örümüş. Elleri gözäl işleri yaparmış. Sora onu mamu bana verdi. Da bän diktim başka işleri. Moldovan ornamentleri diktim. Aşaada daalcaaz yapracıklan hem üzümnän, yukarda da hep üzüm salkımı. Malimdän kalmaa, pek severim eskicilii. Onun varmış kızları da hepsinä peşkir dokumuş. Bana da anam bu peşkiri brakmış. O çoktankı hem gözäl iş»,- söleer Elena Dmitrievna.
Dikilmiş dorojkalar sayılardılar evin uygunnuunan. Onnarlan donadardılar masaları, skemneleri, sandıkları. Onnar olardılar gelin çiizinin bir payınnan. Bölä işlär yısıdardılar evleri hem yortu kıpımnarını başlardalar, herbir dorojka koruyȇr ustacının el sıcaklıını.
«Lääzımdı iki dorokja olsun, ani duvara koymaa karşı biri- birinä. Şkolaya gezärkänä dikärdim, sora da işä gittim, yoktu vakıt çiiz yapmaa»,- söleer Elena Dmitrievna.
Elena Abdula kultura hem aklında tutmasının koruyucusu, angısı baalȇȇr şindiki hem geçmiş zamannarı.
Moldovanın hem Gagauziyanın en mekalı haberleri GRTnın Telegram kanalında!