Komrat kolecında geçti «En ii kendi zanaatında» yarışması. O üçüncü keret olȇr. Onda pay alȇrlar pedagogika bölümün başarannarı.
«En ii kendi zanaatında» yarışmasında genç üüredicilär, terbiedicilär hem muzika uzmannarı göstererlär kendi hazırlanmak uurunu, angısınadan onnar etiştilär üürenärkän kolecda, nışannadı pedagogika bölümü başı Polina İleva: «Hepsi üç zanaat — başlankı klasların üüredicisi, muzika uzmanı hem uşak başçalarında terbiedici. Onnar katılȇrlar bu konkursa. Da o geçer neetlän, ki studentlär göstersinnär kendi hazırlanmakları dört yılda kolecda üürenärkän, üürensinnär biri- birindän, olsun hoşlukları kabledilmiş zanaata hem da yaradıcılık tarafından açabilsinnär kendilerini ».
Musaafirlär hem juri azaları nışannadılar, ani bölä yarışmakları lääzım geçirmää.
«Bölä olaylar lääzımnı hem önemni. Bän, nicä uşak başçasının başı, görerim genç uzmannarın becermeklerini hem bilgilerini, yaradıcılık becermeklerini, ki onnarı ileriya dooru işä almaa».
«Nezaman-sa bän da üürendim bu kolecda, ama şindi işleerim uşak başçasında. Bu konkurs verer kolaylık herbir üüreniciyä kendi becermeklerini hem bilgilerini açıklamaa, göstermää neyä o dört yılın içindä üürendi hem göstermää kendi bilgilerini yaslalarda işlärkän».
Studentlär nışannadılar, ani «En ii kendi zanaatında» yarışması belli eder onnarın becermeklerini, angıları iştä lääzımnı.
«Bölä olaylar lääzımnı, neçin ki onnar vererlär studentlerä kolaylık taa ii olmaa. Yardım ederlär ilerletmää lafetmäk becermeklerini, ki siz raat kalkasınız da çekedäsiniz lafetmää, bakmayarak, kim sizin önünüzdä durȇr. Bu ilerleder yaradıcılık becermekleri».
«Bu pek meraklı, intelektual hem faydalı bir konkurs, angısı verer başka pay alannara, angıları katılaceklar, kuvet hem inanmak kendi becermeklerinä».
«Onnar faydalı insannar için, ki annayabilsinnär, nesoy zanaatları taa ii ayırmaa hem koleca gelmää üürenmää. Onnar ilerlederlär becermekleri onnarda, kim isteer bölä zanaatları kabletmää».
«Bölä olaylar profesional becermekleri ilerlederlär hem bilgileri kaavilederlär».
«Bu yardım eder becermekleri hem bilgileri ilerletmää».