Komrat Devlet Universitenin toplantı odasında, iyül ayın 22-dä, yortulu, ama biraz dalgalı durumdu. Üüretim kurumunu başaran 436 student, çoktan bekleyan diplomlarını kablettilär.
Bu olayı studentlär hem onnarın ana-bobaları bekledilär birkaç yıl. Ekzamennär, testlar, dimlom işin yazması artıl kaldılar geerdä. Kutlamaa hem dilemää gençlerä eni başarıları ileriyä dooru oldu univetsitettä adet.
«Bizim studentlerimizä deyni bu dolu eni kolaylıklarlan eni bir yol başlantısı.Burada siz geçtiniz uzun bir yol, o da oldu dolu çalışmaklan, savaşmaklarlan hem enseyişlärlän. Bu gün halizdän kazanmış diplomları kabledersiniz. Ko sizin becermekleriniz yardım etsinnär sizä kazanmaa eni enseyışleri, ileriyä dä hem ko düşleriniz tamannansın» ,- KDU rektoru Sergey Zahariya söledi.
Lääzımnı saatta zalda toplandılar diil sadece studetlär, ama onnarın dostları, ana-bobaları hem üüredicileri. Hepsi gözäl laflalar hem dilemeklärlän bu gün studentlerä danıştılar. Başarannara kutlamak laflarlan milli Kultura Fakultetın dekanı Oksana Kurteva hem Bakannıık komiteti başının yardımcısı İlya Uzun danıştılar.
«Bu unudulmaz bir gün studentlerä deyni, bir eni sayfa sizin yaşamanızda. Sizä saalık hem eni başarları adȇȇrım, ko bulsunnar kendilerini bizim avtonomiyada»,- İlya Uzun dedi.
«İlktän isteerim kutlamaa studentleri hem adamaa onnara durgunmasınnar, da ileri dooru üürensinnär. İsteerim nışannamaa, ani bizim üüredicilerimiz, mentorlarımız, ana-bobalar studentlerin üüsek uurunu hem hazırlıını nışannȇrlar.Umutlanȇrız,ani onnar ötää dooru da üüsek uurda bizim üüretim kurumu temsil edeceklär»,- milli Kultura Fakultetın dekanı Oksana Kurteva nışannadı.
Yortu atmosferada nışannadılar en ii studentleri. Onnar kablettilär diplomları kendi başarılar için. Bu studentlerin arasında Nikolay Homan. O paylaştı nesoy kazandı bu diplomu.
«Başarının saklılıı kolay; çok savaşmak hem brakılmamak neetindän»,- emin Nikolay.
Onun düşünmekleri bu uurda başka studentlerin neetlerini dä yazdırdılar- istemäk olmaa ilk hem inan,ani gelecektä onnarı hertürlü başarmaklar hem taramaklar bekleer.
«Duygularım dalgalı, çünkü sadece dün biz verärdik burayı dokumentlerimizi, büün biz artık başardık universiteti. Pek mutluyuz, ani etiştik üüremenin sonuna. Umutlanȇrız, ani ilerdä bizi bekleer meraklı işlär hem kapular önümüzdä açık»,-söledi başaran.
«Aklıma geler çok türlü momentlär ,onnar islää dä kötü dä. Ama ii momentlerin sayısı taa çok»,- nışannadı student.
«Mutluyum, ani başardım, dostlarımı, üüredicilerimi özleyecäm. Onnar benim portretlerimdä kaldılar. Gelecektä burada çalışmaa isteerim, zanaatıma görä burada işlemää»,- söledi başaran.
«Halizdän çok duygum var, ilerdä bizi bekleer uzun yol»,-nışannadı genç olan.Ama herbir enseyişin arkasında durȇr diil sadece studentin çalışması, ama onnarın üüredicilerin dä. Bu gün bulundu laf onnara da. Studentlär şükür ettilär onnarı bilgi, destek hem annamak için.
«İsteerim saa ol demää üüredicilerä. Onnar bizä çok bilgi verdilär, çünkü duyȇrım farkı — neylän bän geldim burayı hem angı ii becermeklärlan bän çıkȇrım.Bu üzdän taa bir sıra saa ol hepsinä, ani verdilär bizä kendi bilgilerini hem kuvetlerini».
Nışannȇȇrız, ani Komrat Devlet Üniversiteti 1991 yılda kuruldu. Ozamandan beeri bu üüretim kurumu kolverdi 13 bin student türlü zanaatlara görä.