Panayıya yortusunda Kirsovo küüyün yaşayannarı klisä kurbanını baktılar. Bu gündä burada türlü yortulu olaylar geçirildilär. Onnarın birisi — defile. Genç kızlar gagauz hem bulgar halkların eski rubalarını gösterdilär. Hazırladı bu olayı “Kirsovo küüyün istoriyası” muzeyin başı Evdokiya Stoynova. Ona yardımcı oldular liţeyin üürenicileri.
Herbir fistan hem onnarın elementleri siiredicileri geçmiş ȇpohaya daaldırdılar, getirderäk onnarın akıllarına nicä 30, 40, 70 yıl geeri gagauz hem bulgar karıları, genç kızları giinärdilär. Herbir fistan kendi saabisykasının ecelini koruyȇr. Bu fistananrlan genç kızlar gelin olardılar, uşacıkları vaatız edärdilär. Hem çok başka yaşamak olaylarını karşılardılar hem geçirärdilär. Genç kızlar — modellär, söledilär, ani bu rubaları giidikçä dalgalandılar, çünkü onnar annadılar, ani butakım halklarının geçmişinä dokunȇrlar.
Ulyana Kovalova, defilenin pay alanı, nışannadı : «Bän pek beendim bu rubaları. Onnarı giidikçä, sansın halkımızın geçmiş yıllarına döndük. Bu fistannarın yardımınnan annȇȇrız, nicä götürärdilär kendilerini bizim malilerimiz».
Gösterildi 3 gelinnik fistanı. Onnar siiredicileri mayıl ettilär. Defilenin pay alanı Nadejda Çolak duygularınnan paylaştı.
Nadejda Çolak ,defilenin pay alanı, urguladı: «Bölä rubalara sınaşık diiliz. Ama onnar — bizim istoriyamız. Açan aylemin eski patretlerini siirederim onnarda da busoy fistannarı görerim. Zamandaş gelinnik fistannarı bam-başka. Gelinnerin duakları da başka. Bu fistannar beni dalgalandırȇrlar. Hatırlan geçmiş istoriyamıza danışȇrım».
Büük meraklan siiredicilär herbir modelin podiuma çıkmasını bekledilär. Şamarlarını düüdülär hem «Bravo!» baardılar. Karıların üzlerindä gülüş peydalanardı, açan görärdilär fistannarı, angılarını kendi vakıdında giyärdilär onnarın malileri, anaları, kakuları ya da onnar kendileri.
«Benim gelinnik fistanım bu fistannar gibiydi. Saa olsunnar bu genç kızlar, ani giidilär bu rubaları, biz dä, onnara bakarak, geçmiş yılları aklımıza getidik. Gördük, nicä giinärdilär bizim babularımız hem analarımız».
«Hodulum! Sevinerim halkım için! Saa olsunnar, ani bukdar gözäl bizim kulturamızı gösterdilär. Enidän gördük, nicä gözäl giinärdilär bizim karılarımız».
«Gençliimi, anamı-bobamı aklıma getrdim. Benim anam bölä fistannarı giiyärdi. Sevindim, ani bölä defileyi geçirdilär. Bu duygular bizä deyni pek faydalı. Ko taa sık bölä olayları geçirsinnär».
«Kirsovo küüyün istoriyası» muzeyin başı Evdokiya Stoynova açıkladı, ani pek istärdi, ki bu fistannarı genç kızlar giisinnär da podiuma çıksınnar. Onun bakışına görä — butakım büünkü insannar kendi halkının geçmişinä dokunabilerlär, köklerinnän baalantıyı taa islää duymaa başlȇȇrlar.
Evdokiya Stoynova, «Kirsovo küüyün istoriyası», muzeyin başı, nışannadı: «Bizim küüyümüz pek büük diil. Hepsi biri-birini bilerlär. İnsannarın ecelleri dä bilinerlär. Herbir fistan istoriyamızı koruyȇr. Onnarın yardımınnan biz evlad boylarımıza istoriyamızı göstereriz. Annadabileriz, neçin maasuz busoy giinärdilär ileri bizim karılar».
Geçirmää bu defileyi ideya birdän-birä peydalandı, söleer “Kirsovo küüyün istoriyası” muzeyin başı Evdokiya Stoynova. Ama ozaman muzeydä sadece 3 fistan vardı. Ama uzman neetindän atılmadı, da 2 ayın içindä bu fistannarın sayısı 20-yi aykırladı. Yardımcı oldular küülülär, onnar baaşladılar muzeyä rubaları, angılarını yıllar boyunca korudular.
«Bän inanȇrım, ani bu giimnerin yardımınnan biz hem geçmişimizi koruyȇrız, hem dä kulturamızı ilerlederiz»,- muzeyin başı Evdokiya Stoynova açıkladı.
Pay aldı defiledä Marusä da. O giidi babusunun fistanını. Marusenın babusu 4 kız ayledä. Bu fistan ona kakularından kalmış.
«Bu benim babumun fistanı. Onun adı — Zina. О pek datlı imekleri yapȇr».
20 fistandan zeedä gösterildi defiledä. Nicä söledi Kirsovo küüyün istoriyası” muzeyin başı Evdokiya Stoynova cümnenin baş davaası — kendi halkının istoriyasını korumaa, adetlerini ilerletmää.
Moldovanın hem Gagauziyanın en mekalı haberleri GRTnın Telegram kanalında!