Ferapontyevka küüyün uşak başçası işleyecek. Erindeki sovet kabletti kararı olmaa onun kurucusunnan hem geçirmää kurumu primariya balansına. Butakım kaybeldi risk onun kapanması için, angısı bitki aylar raatsız edärdi üüredicileri hem anaları-bobaları.
Ferapontyevka küüyün uşak başçasında şindi sus olmak- uşakalr kanikullarda bulunȇrlar, neçinki uzmannar otpuskada. Ama diil çoktan burada bilmärdilär açılaceklar mı grupalar güzün. Birkaç ayın süresindä kurum bulunardı kapanmak durumunda. Aylelerin çoyu için uşak başçasının korunması oldu baş soruş. İvan hem Yana Çolak büüderlär üç yaşında çocuu. İkisi da işleerlär da söleerlär- eer yaslayı kaparsaydılar işlemää hem uşaa terebi etmää yok nasıl.
İVAN HEM YANA ÇOLAK ana- boba
Çıkȇrız evdän ya saat beştä sabaaylen ya altıda, yada edidä, da etiştirmeyecez uşşa getirmää yaslaya Komrada yada Tomaya. Te bu kahırlandırardı, biz etiştirämeyecez, karıya sıra geleceydi iştän çıkmaa da uşaklan evdä oturmaa.
Sevineriz sovetin kararına, bizdä pek islää üüredicilär, göreriz nicä uşaklar onnara çekilerlär.
Taa ileri üüretim kurumunu hem uşak başçasını Ferapontyevka küüyündä bir üüretim kompleksinä birleştirdilär- gimnaziya- uşak başçası. Ondan sora nicä kararlandı gimnaziyayı kapamaa yaşayannar kahırlanardılar, ani bölä olacek uşak başçasınnan da, angısına 28 uşak gezer.
TATYANA STOYKOVA Ferapontyevka küüyü gimnaziya-uşak başçası başın işini götürän
Zordu. Biz hazırdık ona, ani bizi kapaceklar, buna sınaşmaa zordu. Yazık, ani bizim gimnaziyada başka ilk çan ötmeyecek. Uşak başçasınnan da vardı problema erindeki sovet istemäzdi olmaa onun kurucusunna. Ama şindi şükür, ani problema çözüldü.
Problema çözüldü çok buluşmaklardan hem annatmaklardan sora. Nicä ananttı Gagauziya üüretim bakannıın başı Natalaya Kristeva üüretim kurumun reorganizaţiyası baalıydı eni kanonnan hem finans durumunnan. Onun laflarına görä beş ayın içindä okula etişmääzdi para da onnar verilärdilär merkez bücetin komponentindän. Hep ölä o aklına getirtti, ani üüretim için kodeksin diişilmesindän sora giriştirlendilär birtürlü koşullar ne baalı üürenicilerin sayısınnan. Eer okul bu kriteriyalara cuvap etmärsäydi ozaman ona reorganizaţiya yapılȇr.
NATALYA KRİSTEVA Gagauziya üüretim bakanı
Büünkü gün uşak başçalarını bütündän devlet finanslȇȇr, birda ban sizin erindeki bücetindän alınmȇȇr, hepsini örter devlet büceti. Bu soruşu barabar primarlan hem nasaatçılarlan baktık.
Üüretim bakannıın haberlerinä görä oktäbrinin birinädän üüretim kurumunda üürenärdi 18 kişi- 11 gimnaziya klaslarında hem edi başlankı klaslarda. Bakmayarak türlü tutturmak ölçülerä gimnaziya cuvap etmärdi devletlän kurulmuş kriteriyalara bunun için ona reorganizaţiya yapıldı. Ama uşak başçası korundu ondan sora nicä erindeki sovet kayıl oldu kabletmää onu primariya balansına. Ama burada komropisä etişmää zordu. Gagauziya Bakannık komitetin başın işini götürän İlya Uzun nışannadı, ani benzeyan durumnar küüyülerin çoyunda var.
İLYA UZUN Gagauziya Bakannık komitetin başın yardımcısı
Bizim daavamız olmamaa daavacı, ama annatmaa – hem primar hem nasaatçılları ayırdılar, ki onnar insana yardım etsinnär hem küüyü problemalarını çözsünnär. Ambiţiayaları lääzım bir tarafta brakmaa, neçinki küüyü zeet çeker. Ama insana önemni çıkışlar olsunnar.
Küüyü sovetin başı Valentina Nedova söledi, ani nasaatçılar şüpeliydilär, ani olaceklar finans harçaları. Ama üüretim hem finanas bakannıklar uzmannarın annatmaklarından sora sovetniklär kararı tutturdular.
VALENTİNA NEDOVA Ferapontyevka küüyü sovet başı
Bän annȇȇrım, ani büün bu aktual problema küüyümüzdä. Sovetniklär şüpelenärdilär kabletmää mı kararı kurucu olmak için, neçinki büük finans harçları var. Ama finans bakannıı hem üüretim bakannıı annattılar naşey nicä. Sovet kabledecek uşak başçasının bücetini hem primariyanın bücetini.
Bu oturuş diil sıradakı da geçti o kultura evindä. Bu olaya katıldılar Gagauziya Bakannık komitetin temsilcileri, uaşak başçasının kolektivi, analar –bobalar. Küüyü primarı Elena Odnostalko şükür etti nasaatçıları kabledilmiş karar için urgulayıp, ani şindi yasla ilerledecek işini.
ELENA ODNOSTALKO Ferapontyevka küüyü primarı
İsteerim şükür edeyim hepsini bu karar için, ama uşak başçası küüyüdä işleyecek hem ilerleyecek.
Ferapontyevkada uşak başçası olacek. Eni üürenmäk yılın çeketmesindän o işleyecek uşak başçası statusunda.