Yol Ferapontyevka küüyün içindän — acıyan bir problema, angısı için şindän sora birkaç yıl, nicä biz söleeriz. Kuyular, kırık asfalt, şoförlar savaşȇrlar aykırlamaa onnarı, neçinki gitmää onnarda yok nicä.
Etişmää deyni Komrada Çadır — Lunga kasabasından yada Çadır — Lungadan Komrada şoförlar sık ayırȇrlar yolu Kongazdan, nışannnȇȇr Ferapontyevka küüyü primarı Elena Odnostalko. O diil bir sıra danıştı infrastruktura Ministerliinä yalvarmaklan yapmaa deyni yolu, ama cuvap, angısı garantiya verecek maasuz işlerin vakıdı için, şindiyadan yok. Odnostalko Elenanın laflarına görä, diil çoktankı Ministerliin cevabında taa bir sıra çizgiledilär, ani proekt var, ama para yok.
«Yazdım cevap, ani planımızda bizdä taa var, para arayacez. Yapaceklar yakın smetayı, nekadar lääzım olacek para 2,6 kilometra bizim küüyümüzdä. Ne zaman bu olacek, diil belli»,- dedi primar.
Gagauziya düzücülük bakannıı ȇks — başı Pötr Zlatov aklımıza getirdi, ani Komrast — Ferapontyevka -Tomay — Çadır — Lunga yolun proekti işletirildi çoktan, ama ölä dä giriştirilmedi, paranın yoksuzluuna görä. Pötr Zlatovun bakışına görä, bu yolun düzülmesi, angısı kurȇr 35 kilometra, zamandaşta var nasıl etsin 15 million evro.
«Bücettän büük paralar harcanȇrlar deliklerin yamalarına» ,- dedi Zlatov.
Nicä annattı Gagauziya infrastruktura bakannıı öndercisi SERGEY BOLGAR, hükümet bakȇr proekti bütündän, Komrattan — Ukraina sınırınadan bütünnä trasayı.
«Onnar neçin sä istämeerlär sade Ferapontyevka küüyün içindä o parça yolu yapmaa, onnar neçinsä bakȇrlar, nicä bütünnä Komrattan Ukraina sınırınadan, Djoltay küüyünü aykırlayıp, Haydar- Çadır — Lunga kasabasının içindän, Ukraina sınırınadan. Cevapta, bän kablettim informaţiyayı, ani bütünnä yolun paası kurȇr 700 million leydan zeedä. Bukadar para bizdä yok. Nicä bulaceklar finans sızıntısını, bu yol koyulacek programaya da yapılacek. Bu iki yıl geeri oldu. Bıldır biz genä danıştık, şindi sa kablettik onu, ani enidän bu yıla yolun yapılması kurȇr şindän sora 900 million ley»,- nışannadı Bolgar.
Finanslamak sızıntısı bu işlär için taa yok, da nezaman o peydalanacek — diil belli. Prost halda bulunan yolların probleması pek aktual bütünnä Moldova Devleti için, çizgiledi Gagauziya düzücülük Bakannıı ȇks – başı : «Karaul diil sade orada. Karaul bütünnä respublikada. Bu pek büük problema, o büüyer. Olaceklar prost yollar, ȇkonomika büümeyecek. Ȇkonomika ilerlämeyecek, erindä kalacek».
Biz yollandırdık danışmayı infrastruktura Ministerliinä, soruşlan Ferapontyevka yolun yapılması için, da sade nicä kabledecez cevabı, genä dönecez bu temaya, da annadacez ne uurda o bulunȇr .
Moldovanın hem Gagauziyanın en mekalı haberleri GRTnın Telegram kanalında!