KDU «Finans dünnesindä gezi» kvesti geçti. Onda pay aldılar universitetin studentleri hem regionun üürenmäk kurumnarından üürenicilär.
Kvest «Finans dünnesindä gezi» KDU geçirildi neetlän üürenicilerin finans uurunda bilgilerini hem logika uurunda düşünmelerini ilerletmää hem finans uurunnan baalı zanaatlara merak uyandırmaa deyni, nışannadı KDU ekonomika fakultetin dekanı Lüdmila Todoriç: «Bu kvestı biz 4-cü sıra geçireriz, ama bu yıl onda pay alȇrlar 80 üürenicidän zeedä. Onnarın arasında studentlär hem Gagauziya şkolalarını başarannar da. Elbetki, biz bu kvesti geçireriz tanıştırmaa deyni onnarı bizim universitetimizlän, ki onnar biri-birlerinnän, üüredicilärlän tanışsınnar hem finans dünnesinä daalsınnar».
Olayın payalannarı türlü kurulu stanţiyalar gezisini gerçekledilär. Herbiri onnardan finans biriminä baalıydı.
«Uzun bir yol yaptık, Kıpçaktan geldik. Geldik hem katılmaa, hem taramaa».
«Öncä yoktur geldik. Neetliyiz taramaa».
«Bu oyun logika düşünmemizi ilerleder. İkinci erdä biz taa islää kasaba erlerini tanımaa başlȇȇrız. Eer sän islää bilärsän kasabayı, herbir sınışı da hızlı çözecän. Bu hem meraklı, hem faydalı bizä deyni».
Olayın sınışları işlediliydilär ölä, ki herbir pay alanının olsun kolayı teoriya bilgilerini hem logika düşünmeklerini praktikada kullanmaa. Gençlär lääzımdılar açıklasınnar sınışları, angıları kasabanın türlü erlerindä bulunardılar.
«Pek meraklı olay. İlk sıra pay alȇrım bölä olayda, neetleneriz taramaa».
«Pek meraklı, biz sade taramaa neetleneriz».
Yarışmanın sonunda belli edildilär tarayannar. İlk erä çıktılar N.Tratyäkov adına liţeyin komandası, ikinci eri kazandılar S.Baranovskiy adına liţeyin üürenicileri, üçüncü er verildi G.Gaydarci adına liţeyin üürenicilerinä.
Avtor: A. Terzi, operator: V.Kıssa, montaj: M.Kazaku.
Moldovanın hem Gagauziyanın en mekalı haberleri GRTnın Telegram kanalında!