Gagauz Erin bügeti için laf dartışmakları oldular. Kendi bakışlarını finans dokumenti için açıkladılar Bakannık komitetin hem Halk topluşun temsilcileri. İlk uurda büсetin gelir hem harç payları bulunȇr hem dä onnarı tamannanması.
Gagauz Erin Bakannık komiteti merkez büсeti küçültmää kararı aldı. Bu tekliflän GHT danıştı. Deputat Aleksandr Tarnavskiy soţial medialarında kendi bakışını açıkladı. O kendi analizini yaptı. Annattı netürlü 2024-cü yılda paralar büсetä geldilär hem netürlü onnar harcandılar.
«Dokuz ayın içindä gelirlerin sayısı 127 milion ley kurdu. Ama vardı planda, ani bu sayı bütün yılın içindä 258,3 milion ley kuracȇk. Ama bu plan var nicä gerçekleşmesin. 100 milion ley var nicä ölä dä büсetä gelmesin»,- dedi Tarnavskiy.
Finans bakanı Tatyana Doyçeva brifingta Tarnavskiy Aleksandrının soţial medialarında yazdıklarına komentariy verdi. O söledi, ani Bakannık komiteti büceti 24 miliona küçültmää teklif etmeer. Teklif ediler geçän yıldan kalan 20 milion leyi bu yıl kullanmaa. Butakım bücetin harç payı 24 miliona diil, ama sadece 4 miliona küçülecek, söledi T.Doyçeva.
«Çizgileeriz, ani 2024-cü yılda bir dä soţial programası hem bir dä ȇkonomika programası zararı görmeyecek. Bundan kaarä kimi soţial programalarında paraların sayısı zeedelenecek»,- nışannadı finans bakanı.
GHT finans soruşları komissiyası oturuşunu geçirdi. Onun azaları Avtonomiyanın büdjetinä teklif edilän diişmekleri baktılar. Kabledildi karar bu soruşu deputatların sıradakı oturuşunda bakmaa.
Avtorlar: V.Çoban E.Manita, montaj: A.Topal