Tarakliya kasabasında kapandı «Mêrţişor-2025» festivali. «Fluieraş» anılmış türkü hem oyun ansamblisi sevindirdi kendi nomerlarınnan insannarı, kim geldi bu konţertä.
«Fluieraş» ansamblisi çok yıl sıravardır tanıttırêr Moldova folklorunu türlü Dünnä arası olaylarında. Tarakliya kasabasında artistlär gösterdilär yortulu programayı — türküleri, oyunnarı, gözäl milli giimneri.Siiriledicilär herbir nomeri kaarşıladılar sıcak. Konţerti pek beendilär.
«Bölä gözäl konţerti hazırlamışlar, pek şen, meraklı, saa olsunnar».
«Bu orkestr pek zengin istoriyasınnan. O gösterdi bizim kulturamızı çok devletlerdä. Pek sevinerim, ani Mêrţişor yortusunu kapêr «Fluieraş» ansamblisi».
«Pek islää, dinnendik.Saa olsun Fluieraş, pek islää, ani geldilär».
«Pek gözäl konţert, lafım yok annatmaa. Canım doldu sade ii duygularlan».
Moldova Parlament deputatı Natalya Davidoviç nışannadı,ani lääzım milletin adetlerini korumaa.
«Bu halizdän büük festival, angısı 10 gün geçiriler Hükümetin hem kultura ministeliin yardımınnan. En anılmış yaradıcılık kollektivleri gösterdilär konţertleri devletin coyu küülerindä hem kasabalarında — Okniţadan Taraklı kasabasınadan. Bu pek şen olay, burada Fluieraş ansamblisi, insannar pek beendilär, şamarlarını urêrlar kaarşılêrlar»,- Natalya Davidoviç nışannadı.
Tarakliya dolayı başı Lazar Dermenji urguladı, ani insannara konţert canına yakın geldi.
«İnsannar beenerlär, zala dolu. Fluieraş elbetki Moldovanın ii kollektivlerindän biri, sanêrım insannar sevdilar, bän dä kendim pek beendim konţerti»,- Lazar Dermenji urguladı.
«Fluieraş» ansamblinin konţerti Taraklıda oldu büük bir baaşış yaşayannara hem festivalin musaafirlerinä, dedi Taraklı dolayı kultura bölümü başı Lüdmila Şebolenko: «Biz kapêrız Mêrţişor festivalini dolayda bölä bir gözäl konţertlän, Fluieraş ansamblisinnän. Biz pek çoktan onnarı bekledik, da şükür ederiz Kultura ministerliini, dolay nasaatını, ani bizdä bu iş oldu, da bu ansambl geldi kasabamıza».
Halklararası Mêrţişor festivali geçer Mart ayın onuna kadar. Onu yortulêêrlar sınır aşırıda da. Festivalin süresindä gösterilerlär klasika, halk zamandaş türkülär, oyunnar, opera, balet hem teatru spektaklileri.
Avtor: A. Karapirä, operator hem montaj: L. Arfonos