Kıpçak küüyündä serbest güreştä halklararası şannı trenerı Födor Franjevı anmak turniri geçti. O 5-ci yıl sıravardır hazırlanêr — bu sıra yaraştılar komandalar Kişinövdan, Komrattan,Kongazdan hem Kıpçaktan.
Şannı trenerı Födor Franjevı anmak turniri geçti komanda formatında açan herbir sportçu getirer notaları kendi komandasına. Zalda toplandılar Födor Franjevın üürenicileri, dostları hem kollegaları. Onnarın çoyu için bu taa bir kolaylık aklına getirmää üürediciyi, angısı rerbibetti hem hazırladı 6 devlet çempionnarını hem kim sevdirdi sportu çoyu uşaklara. Födor Franjev için söledi onun dostu Konstantin Keleş: «Anılȇr benim dostum, o vardı benim dostum — kalȇr da benim dostum. Çok sıra açan siirederim eski fotoları, biz onunnan hep barabar yannaşık durȇrız. Bän onun eşini Katerinayı islää bilerim, çoçukları, sevinerim ani onun işi durgunmadı, gider ileri».
Kıpçak küüyün primarı Oleg Garizan nışannadı, Ani trenerın Födor Franjevın üürenicileri unutmêrlar kendi üüredicisini hem anêrlar onu her yıl.
«Turnir Födor Franzevın adına, o anılmış trener MoldovadaŢ Gagauziyada, o pek beenärdi bu sportu, güreşi, o üüretti pek çok genç çocuk, angısınnar büün kazanȇrlar birinci, ikinci, üçüncü olȇrlar Evropada, dünnedä»,- Oleg Garizan nışannadı.
Turnirä Türkiyeden Födor Franjevın dostu da geldi.
«Biz 2000-ci yıldan beeri tanışȇȇrız, eski bir dostuz, Gagauziyada çok sevdii çok kıymet verdii insannardan biriydi, Kıpçak bizim kardaş belediyemiz — bän eski belediye başkanıyım Türkiyadan. Tanıştık — her sizin bayramnarınızakatılmaa çalışȇȇrız, onnar da bizü katılardılar, Todur — üürenici, güreşici getirärdi. Çok sevdiimiz bir insandı, kardaşımızdı. Onun adına düzän turnirä katılır, o sebeplän buradayız».
Her yılkı turnirlerä gelennerin arasında taa bir dost — serbest güreştä veteran — Zinoviy Dragan. O islää biler Födor Franjevı, aklısında barabar sportan zanaatlanmaklar.
«Bän açan zanaatlanardım güreşmäklän, Födor bendän küçüktü, sora o başladıydı trenerlık etmää, biz onnan pek islää yaşadık, gittim ona da güreşä.. pek islää,ani geçerlär turnirlär, gòreriz biri-birimizi, nicä sport yapardık, güreşärdik, buluşêrız çoyunnan turnirdä»,- Zinoviy Dragan söledi.
F.Franjev anmak turniri her yıl taa çok pay alan hem siiredici toplêêr, gösterip, ani onun işi ilerleer, adetlär da korunêrlar güreştä, dedi Födor Franjevın oolu Mihail: «Isteerim hepsini şükür etmää, çocukları, üürenicileri, kim bakmayarak kendi vakıdına, işlarinä, zorluklara, koydular kuvetlerini da geçer turnir. Sayêrım, ani o üüsek uurda olêr, hepsi savaştı — neylän yakıştı, yardım ettilàr, saa olsunnar».
Turnirın fondu kurdu -ilk er- 1000 evro, ikinci -750 evro, üçüncü er -500 evro. Çıkışlara görä ilk eri kazandı Kıpçak küüyün komandası, ikinci erdä- Kişinöv muniţipal liţeyi, üçüncü erdä da Kişinöv respublikan liţeyi.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!