«2024-cü yılda Gagauz dilin kullanmak sferasının genişletmäk Programasının çıkışları için laf gitti GHT oturuşunda. Bundan kaarä deputatlar kablettilär 2025 yıla Programayı.
Gagauz dilinin kullanmak sferasını genişletmäk Programasını hem onun tamannaması 2024 – cü yılda Üüretmäk bakannıınnan geçirili olayları hem Bilim-Aaraştırmak merkezinnän, Kultura bakannıınnan yapılan işleri M.Maruneviç adına Bilim-aaraştırmak merkezi başı İrina Konstantinova açıkladı: «Bakın bu çasoslov gagauz dilindä, istoriya uurunda sözlük, mediţina terminneri sözlüü, Kotovskiy küüyü için kiyat, üüredicilerimizä jurnallar üüretmäk için, uşaklarımıza türkülär fleşkada yazıldılar».
Rapordun seslemesindän sora Üüretmäk komisiyası başı Dmitriy Manastırlı nasaat etti merkezä verilän finansları lääzımnı uura geliştirsinnär.
«Kanonun normalarını kullanmaa deyni kalmasın ölä para, nicä 2024-cü yılda 60 bin. Siz vakıtlan koyasınınz işä, ki ilerletmää ana dilimizi»,- Dmitriy Manastırlı nasaat etti.
Uşaklara deyni tiparlanan dergileri ,angı kurumnara hem sayıda daadılȇrlar, deputat Grigoriy Dülger meraklandı: «Programada 2025-ci yıla kaç kiyat, angı uşak başçalarına daadȇrsınız, Guguşçuk dergisini. O jurnalı 12 ayda kimä verersiniz?»
«Dergileri Kultura bakannıımız daadȇrl uşak başçalarımıza, başlankı klaslara. Onuştan bukadar ȇkzemplär veriler. Onnar kuruma verilerlär, diil uşaklara»,- İrina Konstantinova açıkladı.
Gagauz teatrusu D.Tanasoglu hem Kösä adına teatrusu nekadar gagauz dilini kullanȇrlar, genişlederlär hem çalıştırȇrlar spektaklilerindä İrina Konstantinova açıkladı: «Bizim D.Tanasoglu adına teatrumuza her yılın ödeklär ödener. Onnar göstererlär raportunu, angı küülerä giderlär, nesoy spektaklileri göstererlär. Kösä adına teatr gagauzça bir da spektakli yapmȇȇrlar, ödek ta almadılar. Bu yıl onnar kayıllıını verdilär, ani gösterek yapaceklar, bunun için da ödenecek».
Halk Topluşu Viţe-spikeri Georgiy Leyçu kaldırdı soruşu, var olan kanonun faydalıı için.
«Biz her yıl milionnan ley vereriz bu programaya, siz analiz yaptınız mı, genişlendi mi uşakların sayısı, ani gagauz dilindä lafederlär. Kiyatları yazmakta faydası olsun»,- nışannadı Georgiy Leyçu.
«Geçän yıl dekabr ayında YUNESKO açıkladı kendi raportunu, angısında bizim dilimizin statusu diişti, taa üüsek uura çıktı. Kayıp olmak statusundan çıktı. Bu paraları, angıları verilerlär kiyatların basılmasına, uşak başçalarımıza, şkolalarımıza –dooru işi yapȇrız. Bölä gidärsäk, 2-3 yılın içindä kurtaracak durumu kalmayacek»,- İrina Konstantinova açıkladı.
GHT oturuşunda başka uurlardan soruşlar da bakıldılar.
Avtor: S. Dimitroglo, operator: S.Georgiev, G.Stavilov, montaj: M.Kazaku
Moldovanın hem Gagauziyanın en mekalı haberleri GRTnın Telegram kanalında!