Komratta Gagauziya açık futbol kuboo kız komandaları arasında geçirildi. Meydanda dört komanda buluştu. Herbir oyuncu buraya sade taramak için geldi. Yarışmaların çempionu Kişinövdan komanda oldu.
Turnirin çorbacısı— kız futbol komandası Komrattan — bütün devleti temsil edän komandaları kabul etti «FK Kişinöv», Kişinöv «Zimbru” komandası hem da Aneniy Noy kasabadan komandası. Üüsek hazırlanmalar hem da oyunnarın sık grafii futbolculardan maksimum dayanıklılıı istedi. Gençlik hem sport bakanı erinä çalışan Pavel Tulba dedi, ki Gagauziya Açık Kuboo geçirilmesi kızlar futbolunun ilerlemesini gösterer.
PAVEL TULBA
Gençlik hem sport bakanı erinä çalışan
“Bu gün siz sade katılımcı, sade prizör yada çempion olmadınız. Siz bu adı kazandınız da bu ad sizinnän ömür boyu kalacek. Gagauziya Açık Futbol Kuboo prizörü yada çempionu olmak, düşünerim, çok prestijli olacek. Bu, belki da kendi çocuklarınıza, torunlarınıza bir ad kalacek.”
Turnir çevri sistemasına görä geçirildi, ona görä hiç bir da oyunda geri adım kalmaa yok niceydi. Yarışın neeti— genç sportçulara önemni oyun becermekleri kazanmak. Bu kızların çoyu bugün artık büüklär gibi taktika hem da topa kullanmak becerisini gösterer. Komrat komandası treneri Andrey Leonov söledi, ki oyunda meydanın herbir metra için güreşildi.
ANDREY LEONOV
açık kuboo hazırlayıcısı, Komrat komanda treneri
“Bizim kız futbolunda herzaman meydanda büük bir ajiotaj var. Bizim adetçä turnirimiz Gençlik hem Sport bakannıınan, Gagauziya Futbol Federaţiyasınnan hem da Komrat Gençlär Sport okulunnan birliktä geçiriler hem üüsek uurda geçer. Her yıl bizdä ii komandalar var.”
Meydanda girginnik herbir minuttan büüyärdi. «Anenii Noy» komandası üüsek hazırlıını hem istemesini taramaa, teknik hem da takım oyunu gösterdi . Ama bu sefer podiumdan bir adım uzakta kaldı. İkinci erä bakmadaan, kızlar bitkiyadan taramak için güreştilär, nışannadı Anenii Noy «Agarista» FK komanda treneri Larisa Lazar.
LARİSA LAZAR
Anenii Noy «Agarista» FK komanda treneri
“Biz bu turnirä ilk keret katılmêȇrız. Bizi çok sevindirer ki, çempionatlar arasındaki aradan sora kızlar burada genä buluşêrlar. Bu turnirdä onnar eni dostluklar kurêrlar yada eski dostluklarını enilederlar. Kızlar dost olêrlar hem da biri birlerini destekleyeräk taa da kaavi oynȇêrlar. Her yıl taa gözäl oyun göstererlär. Bugün hava çok sıcaktır, ama kızlar ellerindän geleni yapêrlar hem da meydanda maksimum kuvedini vererlär.”
Turnirin dördüncü eri futbol akademiyasına «Zimbru»ya gitti. Komanda ii disţiplina gösterdi. Ama Gagauziya Açık Kuboo çempionu «FK Kişinöv» oldu. Baş kasabasından sportçular bütün turniri inançlı geçirip kuboo kazandılar. Onnarın takım oyunu hem da güvenlii oyunnarı konkurentlarına şans vermedi. Bunu komanda treneri açıkladı Dmitriy Gruşevskiy.
DMİTRİY GRUŞEVSKİY
«FK Kişinöv» kız komandası treneri
“Biz iki yıl arka arkaya ikinci eri aldık. Bu yıl sevineriz, ki kazanêrız, birinci erdä olêrız. Ama genä da hepsi kızlar kaaviydi. Var kızlar futbola eni başlȇêrlar, kimsä dä uzun zaman oynêêrlar. Bu gruplan bän üçüncü yıldır çalışêrım.”
Ama bugün en ii duygular turnirin pay alannarın üzlerindä. Onnar söleer, ki bu kazanılan ödüllär için sınışlarda bütün kuvedini koydular.
“Benim için bu çok ii bir motivaţiyadır. Çok, çok uşak futbol oynamak isteer, ama oynayamêêr. Herkezin buna sebepi var.”
“Bu benim canımdan isteyerek yaptıım . Anam-babam da istärdi, beni destekledilär. Bän da bunu çok istedim.”
“Zordu, özellikle şimdi oynadıımız komandaylan. Çünkü onnar güçlüdür. Bölä güçlü komandaya karşı oynamak her zaman zordur. Bir da bu sıcakta.”
“Dorudan dediynän , oyun çok ii geçer. Hepsi kızlar çalışêr. Biz biraz taa yavaş oynêêrız, çünkü taa eni başlêrız. Bir-iki yıldır futbol oynêêrız. Çok çalışêrız. «FK Kişinöv» komandadan kızlar da çok iidir.”
“Biz çalışêrız. Umutlanȇrım gelecektä taa ii oynayacȇz. Gelecek yıl da taa ii uurda buluşacȇz.”