Gagauziyanın Cümnä Aksakallar Nasaatı politika hem soţial ȇkonomika durumunu avtonomiyada hem devlettä açıkladı.
Sebep buluşmaya Aksakallar Nasaatına yaşlı insannardan türlü uurlarda danışmaklar oldular. Açıklamakların arasında yaşlı insannarın zorlukları, avtonomiyada hem devlettä durum belli edildilär.
«Devlet kuvetlerin dikkatlıını isteerim doorutmaa yaşlı insannarın problemalarına, yardım etsinnär onnar yaşamaa. Bizim insanımız, üüredicilerimiz, başkaları, angıları 40 yıldan zeedä işledilär, büün satȇrlar, neleri sovet vakıdında aldılar, çünkü yok ne isinnär. Paalar dual gazına, şafka 30, 18 ley tutȇrlar»,- nışannadı Vasiliy Arnaut, Gagauziyanın Aksakallar Asoţiaţiyasının başı
Valkaneş kasabası Aksakallar Nasaatın başı Födor Koliş söleer, ani kasabanın pensionerlerin 80%-di fukaarä.
«Pensionerlar 3000 bin. Kär taa zeedä da kabletselär, yarı parayı ilaçlara harceerlar. İnsannar bet yaşȇȇrlar»,- Födor Koliş söleer.
Çadır – Lunga dolayın Kiriet – Lunga küüyün Aksakallar Nasaatın başı Grigoriy Radov devletin kuvetlerin Gagauz avtonomiyasının liderlerinä karşı haksızlıını açıkladı.
«Merkez kuvetlerin haksızlıı avtonomiyanın kuvetlerinä doorudulu kanona karşı yapılȇr- bu ne baalı Başkannan da, HT başınnan, deputatlarlan»,- Grigoriy Radov söleer.
Gagauziyanın aksakallar Nasaatın azası Sofya Petrova, 40 yıldan zeedä üüredici işledi. Onu brakmȇȇr raada avtonomiyada, devlettä gençlerin aşırıya gitmesi.
«Gençlerimiz zorundan gider kazanca bir kırıntı ekmek kazanmaa. Hem isteerim belli etmää, ani talntlı gençlerimiz giderlär»,- Sofya Petrova söleer.
Gagauziyanın Cümnä Aksakalları Nasaatın oturuşun sonucu rezolüţiya proekti oldu, angısını oturuşun hepsi pay alannarı tutturdular. Rezolüţiya avtonomiyanın hem devletin kuvetlerinä yollandırılacek.
Avtor: S. Dimitroglo, operator: V. Tabaçuk, montaj: M. Kazaku.
Moldovanın hem Gagauziyanın en mekalı haberleri GRTnın Telegram kanalında!