Çiçek ayın 22-dä GHT deputatları sırada olmayan topluşa toplandılar. Oturuşun süresindä bakıldı sade bir soruş. O GHT seçimnerin geçirilmesininnän baalıydı.
En önemni soruşların arasında bulundu HT seçimnerini kirez ayın 21-dä geçirmäk soruşu. Oturuşun süresindä deputatlar baktılar soruşu diplomatiya hem kanon uurlarından. Deputat Pötr Fazlı nışannadı, ani avtonomiyanın kanonnarın bakılması konstituţiyaylan kararlansın lääzım.
«Bizdä var taa bizim türk kardaşlarımız. Meraklı olaceydı annamaa , angı soruşlar bitki gezidä bakıldılar. Buradan isteeriz bilmää var nasıl biz tutturmak bekleyelim»,- Pötr Fazlı nışannadı.
GHT başın işini götürän Nikolay Ormanji açıkladı Halk Topluşununnan gerçeklenän adımnar için. Onun laflarına görä danışmaklar yollandırıldılar Büük elçiliklerä , halklar arası strukturalarına hem Türkiye devleti prezidentinä.
«Bi̇z doorudan Türki̇ye devleti prezidentinä Recep Tayyip Erdogana danıştık, ki o durumu açıklamamız için bizi kabletsin. Bizim informaţiyamıza görä, danışmamız şansora etişti ona. Biz bekleeriz cuvap hem umutlanȇrız , ani kabledecez destek politika krizisindän çıkması uurunda»,- Nikolay Ormanji açıkladı.
Annaşmanın lääzımnıını nışanadı GHT deputatı Aleksandr Tarnavskiy, göstereräk başka bir proekt. Onun laflarına görä krizis durumu avtonomiyanın işindä belli olȇr: ne kontribuţiya fondu , ne kapital investiţiyaların fondu işlämeerlar. Olȇrlar zorluklar kanonnarın kabletmesinnän hem büdjeta diişilmekleri kabledilmesinnän.
«Baarışmakların vakıdı hem bir tarafa doorudulan kabaatlar lääzım bitsin. Bu durumu çözmää deyni, lääzım iki tarafın başarılmadık işlerini kabletmää da aramaa çıkış»,- GHT deputatı Aleksandr Tarnavskiy nışanadı.
Deputat İvan Dimitroglo da açıkladı buna benzeyän poziţiyasını, açıklayıp yannışlıkları, angıları önceki GHT çarışınınnan yapıldılar.
«GHT almadı esaba diişmekleri, angılarını MD Parlamenti kabletti. Lääzımdı vakıdında bu işä katılmaa, ki düşmemää büünkü krizisä, angısı Avtonomiyanın imidjinä negativ belli eder»,- İvan Dimitroglo açıkladı.
İvan Dimitroglo nışannadı, ani dialog merkez kuvetlerinnän bir uurda olsun lääzım: «Deputatlar lääzım annaşmak masasına otursunnar, dialog bir uurda lääzım geçsin-bizdä bunun işin hepsi haklar var».
Deputat Demyan Karaseni açıkladı, ani durumun uzadılması diil lääzım olsun.
«Biz lääzım laflan hem annaşmaklan çıkışa gelelim, neçinki bu soruşlar var nasıl yıllarlan uzansınnar, seçimnerin geçirilmesini sä hepsi isteer»,- Demyan Karaseni açıkladı.
Oturuşun çıkışlarına görä deputatlar taa bir sıra açıkladılar kendi neetini seçimnärlän baalı krizisi çözmää. Onnar HT prezidiumunnan işledilän proekt kararı için kendi seslerini verdilär. Bu proekttä belli edili Halk Topluşu seçimnerininnän baalı durumdan çıkması hem seçimneri geçirilmesi için merkez kuvetlerä danışmak.
Moldovanın hem Gagauziyanın en mekalı haberleri GRTnın Telegram kanalında!