Çadırdakı «At-Prolin» beygir fermasında bitkiy hazırlanmaklar Hederlez-2026 yortusuna geçerlär. Burada musaafirleri zengin hem meraklı proframa bekleer.
Yakın vakıtta «At-Prolin» beygir ferması dolu olacek musaafirlär, muzikaylan, gagauz milli imeklerin kokusunnan hem büük yortunun şenniinnän. Şindi sa bitki hazırlanmaklar yapılêrlar. Yortu halizdän lääzım osun meraklı — burada halk ustacılar Kendi becermeklerini göstereceklär, incä zanaatçılar olacek, ayırı milli evceezlär, neredä gagauz halkın yaşaması hem adetleri açıklanêrlar. Musaafirlerä teklif edileceklär türlü imeklär, ayırı bulgur — kurban- Hederlez yortunun özel simvolu. Elbetki çok dikkatlık verilecek adetçä geçirlenän atlarda yarışmalara, angıları her yıl çok siiredici toplêêrlar. Şindiki vakıtta burada çok kişi çalışêêr — kuruculardan yaradıcılık kollektivlerinädän. Artistlär repetiţiya yapêrlar, oyunnar tekrarlanêrlar, ki büük açılış üüsek uurda geçsin. Nicä söledi Gagauziya kultura bakanı Marina Semönova, «Hederlez» yortusu gagauz halkında özel gem önemni eri kaplêêr.
«Hazırlanmaklarda da, yortuda da pay alȇrlar kultura uurunda çalışan insannar, pay alȇrlar muzeylär dä, kultura evleri dä, bibliotekalar da — hepsi katılȇr, hepsi karışȇr, neçin ani yortu okadar büük hem geniş — kuvetlär dä lääzım okadar olsun genış, neçin ki bu yortuyu başa çıkarmaa deyni. Elbetki adetçesinä yortumuzda olacek herbir iş, neyä sınaştı bizim insannarımız, musaafırlerimiz. Geniştän geçecek. Saat 10 hepsini bekleeriz Gagauziyanın yaşayannarını, eveldän gagauzlar brakarmıştılar bu günü herbir işini- iş olacek başka günü dä, amma bu gün lääzım brakmaa bir tarafa, bulup vakıt, gelmää Çadır kasabasına, «At-Prolin» fermasına da bizimnän bilä sevinmää bizim evelki yortumuza»,- söledi Gagauziya kultura bakanı Marina Semönova.
Şindiki burada hem kultura, hem agrar bölümnerindä hazırlamaklar geçirilerlär, dedi Gagauziya çiftçilik bakannıın başın yardımcısı Svetlana Kuţar: «Biz savaştık pek çok da yaptık ne lääzım hazırlıkları, ani o gün geçsin pek gözäl bir erdä, şen da hepsi sevinsin, ansın eski bizim adetlerimizi, unutmayalım, ani bu günün pek büük maanası var bizim avtonomiyamız için, bizim insananr için. Bizim eskidän kalan adetlerimizi biz bu yortuda gösterecez uşaklara da ,ani hepsi görsün, ani eskidän bu günä insannar kendi uşaklarına da gösterer niceydi hem nicä lääzım olsun».
Programanın hazırlanmasında yaradıcılık ustaları çalışêêrlar. Ayırı dikkatlık veriler yortunun kurulmasına, neçin ki herbir moment lääzım başarılı olsun.
Viktor Gradinar «Düz-Ava» ansamblinin horeografı: « «Hederlez» yortusunu biz her yıl hazırlêêrız, her yıl eni progranz, o bizdå tekrarlanmêr, bekim ayırı momentlär. Teatrulu bizim oyunnar olêrlar, hazırlanmaa savaşêrız iki üç ay ileri yada taa erken. Bu yıl meraklı programa hazırlanêr, yarım saatlık, oyunda pay alêrlar teatru uzmannarı da, taa nelär sa meraklı işlär olaceklar, açmayacez hepsi ufaklıkları».
Gagauz milli teatrunun baş rejisöru Anatoliy Radulov nışannadı, ani Hederlez yortusuna hazırlanmaklar üüsek uurda geçerlär.
Anatoliy Radulov Gagauz milli teatrunun baş rejisöru: «Umutlanêrım, ani sevindirecez hepsi musaafirleri, gözäl yortuyu onnara hazırlayacez. Bu büük önemni halk adeti, burada çok folklor var, bän dädu rolündäim, savaştık evelki oyunu diriltmää, da gösterecez onu bizim siiredicilerä».
Kurucular teklif ederlär hepsi yaşayannarı hem musaafirleri May ayın 6-da «At-Prolin»-ä barabar «Hederlez-2026» yortusunu kutlamaa.