Gagauziya Regional hatalı olaylar bakannıın uzmannarı açık kapular yortusunu geçirdilär. Kıran ayın 10-da burayı musaafirlää M.Eminesku adına liţey üürenicileri geldilär.
Açık kapular günündä Regional hatalı olaylar bakannıın uzmannarı uşaklara deyni özel bir programa hazırladılar. Uşaklar lafedäbildilär uzmannarlan, angılarının baş neeti herbir sekund insannarın yaşamaklarını kurtarmaa hazır olmaa, yaşayannara yardım etmää.
Andrey Rotar Komrat kasabası yangın hem kurtarmak bölümün uzmanı: «Bu transport bizdä ilk erdä durȇr. Bişey olarsaydı bu transport ilk çıkȇr. Şindi havalar islää, onuştan biz onu kullanȇrız, ama kär olarsaydı bizdä başka transport var».
Üürenicilerä gösterildi yangını sündürmäk kolaylıkları, bu iş için üüsek tansionnu su şlanglarını kullandılar. Bundan kaarä, uzmannar annattılar hem gösterdilär uşaklara, nesoy kurtarılȇrlar insannar, eer transport razgelmesi olduysaydı. Nesoy maasuz tehnikanın yardımınnan onnar insanı transporttan çıkarȇrlar.
Üüredicilär nışannadılar, ani bölä praktik olayları yardım ederlär uşaklara taa islää annamaa nekadar zor hem cuvapçı kurtarıcıların izmeti. Bundan kaarä uşaklar başlȇȇrlar annamaa nesoy taa dooru götürmää kendilerini hatalı olaylar vakıdında.
İna Domenko M.Eminesku adına liţey üüredicisi: «Bu olay bizim uşaklarımıza deyni pek önemni. Onnar üürenerlär kendilerinä taa dikkat olamaa hem kendilerini korumaa. Uşakların var kolaylıkları görsünnär nesoy işleerlär hatalı olaylar bakannıın uzmannarı, nesoy onnar yangını sündürerlär yada insanın yaşamasını kurtarȇrlar. İsteerim şükür etmää onnarı onun için, ani onnar kimär sıra kendi yaşamaklarını korku altına brakarak, yardıma bizä gelerlär».
Açık kapular yortusu MD hatalı Olaylar bölümnerin çoyunda geçirildi. Olayın baş neetiydi-annatmaa hem göstermää uşaklara nesoy lääzım götürmää kendini hem nereyi danışmaa belaylan karşı geldiynen, nışannadı Gagauziya Regional Hatalı olayları bakannıın uzmanı Nikolay Nikologlo: «Herbir uşak büün yakışȇr MD hatalı olaylar bölünmerindä bulunup bizim işimizlän tanışasın. Bölä olaylarda biz onnara kendi işimiz için annadȇrız. Onnara deyni türlü situaţiyaları kurȇrız hem onnarı açıklamak kolaylıklarını göstereriz. Bölä olayları uşaklar pek islää aklılarında tutȇrlar».
Olayı geçirennär nışannadılar, ani uşakların Hatalı olaylar bakannıına gelmesi diil sade meraklı olsun, ama gelecektä kiminsä yaşamasını da kurtarmaa var nicä yardım etsin.
Moldovanın hem Gagauziyanın en mekalı haberleri GRTnın Telegram kanalında!