Gagauziyanın kimi üüretmäk kurumnarına bu eni üüretmäk yılına etişmeer finanslar aylık parasını çalışannara hem komunal izmetlerini ödemää. Etişmeyän finanslarlan soruş, angı uurda bulunȇr Gagauziya Bakannık komiteti oturuşunda açıklandı.
Finansların etişmemezlii problema sade üüretim kurumnarına diil. Üstün finanslamak lääzım sport okullarına hem soţial kurumnarına, angıları paraları devletin büdjetindän kablederlär. Gagauziya finans bakanı Tatyana Doyçeva haberleer, ani kimi kurumnarda defiţit bütün devlettä gözlediler, kim paraları devletin büdjetindän trasfertlerı kablederlär, onun sayısı 26 mln. leyi geçer.
ТАТYANA DOYÇEVA Gagauziya finans bakanı
«Aylık parasını ödemäk defiţiti bütün devlettä var, Gagauziya da bu sayıya girer – kurumnarın içinä sade okullar, liţeylär girmeerlär, burayı soţial kurumnarı da girerlär. Toplam sayı 26 mln. leyi aykırlȇȇr».
Kurumnara etişmeyän finanslarlar ne türlü tamannanaceklar, Bakannık komitetin oturuşunda, HT başın yardımcısı Nikolay Ormancı kaldırdı. O meraklandı, nesoy adımnar yapılȇrlar, ki erindeki kurumnarın büdjeti zamannan tamannansınnar da çalışannar kazanç paralarını kabletsinnär.
NİKOLAY ORMANCI GHT başın yardımcısı
«Gagauziyanın kimi gimnaziyaların hem liţeylerin üürenmäk yılın çeketmesinä esik büdjetleri. Üüretim ministerliinnän ne yapılȇr, ki büdcetleri inceläärkenä korektirovkalar yapılsınnar da okulların problemaları olmasın işçilerin aylık paralarını, komunal izmetlerini ödemää?».
Tatyana Doyçeva açıkladı, ani Moldova Hükümeti devlet büdcetinä diişikleri geliştirmäk proektini baktı. Bu vakıt dokument cümnä seslemeklerindä bulunȇr, nedän sora o Parlamentä inandırmak için doorudulacek.
ТАТYANA DOYÇEVA Gagauziya finans bakanı
«Bizim büdcet kanonumuzda var punkt, angısına görä finansların sayısını var nicä diiştirmää hem onnarı erindeki büdcetlerä geçirmää».
Devletin büdcetinä diişikleri geliştirdiktän sora, finanslar kurumnarın defiţitini tamannamak için doorudulaceklar. En ilk esaba alınȇr kurumnarın çalışannarına zamnnan aylık paralarını ödemää.