Gagauziyada ilk grupa bereketi toplamak kampaniyası ilerleer. Hava koşulları vererlär kolaylık vakıtlan bodayları ambara koymaa. Bakmadan kuraklaa hem ayazlara bu yıl agrariyalar ii bereket toplȇȇrlar. Nicä gider bu işlär Çadır kasabasının çiftçi kurumnarın birisindä üürendi bizim korrespondent.
Nicä sölerlär insan arasında, bereketi toplamak günnerindä bir işletme çalışmaktan vazgeçti. Onun için Avtonomiyanın agrariyaları çıkardılar bütün tehnikayı kırlara , ki vakıtçasına toplamaa bodayları ambarlara. Georgiy Paşalının kurumunda başarȇrlar toumnuk ekinin biçmesini. Nicä urguladı agrariy, bu yılın kuraklıı hem ayazları belli ettilär kendilerini büümnerdä, ama buna bakmadaan ambarlara şindän topladılar rapsı, arpayı, güzlük gorohu, ekini. Büünkü günä orta bereket kurumda 3-6 tonn ektardan.
«Kirez ayın 23 dän ilk günü başladık bereketi toplamaa, yakın bir ay toplȇrız. Saol mayın yaamurlarına, angıları dooruttular durumu. da biz topladık orta 28 ţentner raps, 28 ţentner goroh, 60 ţentner güzlük arpa. Ekin meralara görä 44 tän- 60 ţentner»,- Georgiy Paşalı annattı.
Agrariyın laflarına görä bereketi büüderäk karşı gelerlär çoyu problemalarlan, angıları bitki yıllar pek belli oldular. Onnarı çözmää deyni lääzım birerdä devletlän işlemää sayȇr agrariy.
«İlk problema bu ani yok nemnik, ikinci bu üüsek temperaturalar, sıcak angısı bitki 4 yıl içindä, sade bir yıl verdi kolaylık kabletmää papşoy bereketini. Taa çok o yanardı. Te büün 37 gradus, biz umutlanerız, ani ne sa olacek, yaamur yaacek»,- nışannadı çiftçi.
Nicä sölerlär agrariyalar hem kombaynörlar bir gün kırda kaçırdın, bereketi kaybettin. Onun için her gü iki kombayın çin sabalendän geç vakıdadan toplerlar ekini ambarlara. Nicä söler kurumun başı büün eni tehnikada pek kolay işlemää hem komfort, amma var problema işçilärlän, gençlär çekilmeerlär bu sektora.
«Ne baalı mehanizatorlarlan , gücenikliyiz, ani gençlär gelmeerlär çiftçilik bölümünä, onnar giderlär devlettän, biz şindän duyerız ani etişmeer uzman bizä, biz bu uurda işleriz prosesional-tehnik uçilişelarınnan»,- urguladı Paşalı.
Bereketi toplamak kampaniyası yaklaşer sonuna Valkaneş dolayında, büük kurumnar başardılar bereketi toplamaa, da yardım ederlär küçüklerä. Komrat dolayındada etişer kendi bitkisinä. Nicä nışannadı Agrar bakanı Sergey İbrişim , bu yıl bakmadanaan ayazlara hem kuraklaa, bereket diil prost. İlk grupanın kulturaları Gagauziyada ekili 34 bin ektarda.
«Plana görü bereketin kampaniyası sonuna yaklaşȇr. Gorohu topladılar, raps toplandı ilkyaz arpayı topladılar, Kaldı güzlük ekini başarsınnar. Büün orta bereket güzlük ekindä 4,5-6,5 tonadan. bu pek ii. Ama her bir agrariya büün önemni bitkidä ii paa olsun. Amma o büün küçük, umutlanerız ani ötää dooru zeedelenecek»,- açıkladı Sergey İbrişım.
Bütün toplanılmış bereketi kurumda zernotoka götürerlär, neredä onu paklerlar, soram da ambarlara koyȇrlar, ki erli çiftçi kurumlarına satmaa.
Moldovanın hem Gagauziyanın en mekalı haberleri GRTnın Telegram kanalında!