Gagauziyada soţial işçilerini kutladilar. Yortulu olay Komrat kasabasının Kultura Evindä geçti.
Soţial işçileri her gün yardımcı olȇrlar maasuz kolaylıklarlan insannara, kim yalnız yaşȇȇr,kim zor durumda bulunȇr, hasta yaşayannara.Avtonomiya öndercileri nışannadılar soţial uzmannarın üüsek uurda çalışmalarını.
İlya Uzun, Gagauziya Bakannık komiteti başı ilk yardımcısı: «Hodulluklan söleerim ,ani soţial işçileri — büünkü günnerin kahramannarı.Sizin dayanmanız, yardımınız, destekliiniz olmaa her gün insannarın yanında –bu pek önemni.Halezdän şükürlüüm o insannara, kim Gagauziya soţial sistemasında temeli koydu,da örnek gençlerä olȇr. İnsannar mutlu olsunnar çalışmalarınıza. Ko iiliklär sizä dönsünnär».
Dmitriy Konstantinov,GHT başı: «Siz yardımcı olȇrsınız bizim dostlarımızın çoyuna. Siz bir baalantıyı kuvetlerin hem zor durumda bulunan insannarlan kurȇrsınız. Saalık,dayanmak hem sıcaklık sizä».
Soţial uzmannarı ödülleri hem sıcak kutlamakları kablettilär kollegalardan, avtonomiya kuvetlerindän.
Ȇdgar Dimov Gagauziya saalık hem soţial bakanı: «Siz diil sade uzmansınız,siz büük kalplan insannarsınız. Yaşamamızı aydınnadersınız. Sizin hatırlı çalışmalarınız insannara, çoyu aylelerä destek hem inan verer».
Gagauziyada üzlän soţial uzman çalışȇr. Herkezi onnardan bütün can sıcaklıınnan çalışȇr, nışannȇȇrlar musafirlär.
Lübov İvançeva, Çadır-Lunga aylä evi terbiedicisi: «Çalışmamı bütün ürektän yapȇrım,Allahın yardımınnan.Gagauziyada olmasın üsüz uşak,angıları bulunȇrlar zor durumda.İsteerim tamannamaa bu izmeti -Ana gibi çok uşaklara dayak olmaa hem örnek».
Mariya Kilimiçenko, Ayozlu Panteleymon merkezin soţial işçisi: «Sınaşıkım işlemää ihtär insannarlan.Çok vakıt mamumu yatalak baktım.Bilerin ne lääzım onnara,nesoy lafetmää onnarlan».
«İnsan geler,dinnenerlär bizdä,ne var zorları söleerlär. Biz sesleriz,yardım ederiz.İhtärlar pek şükürlü bizä,ani biz varız».
İvanna Komur, soţial işçisi, Kongazçik küüyü : «Zanaatım pek önemni. Biz her zaman insannara yardımcı olȇrız. Nekadar taa çok iilik, okadar canımız da seviner.Deerlär-Yap iilik, da iilik kabledecän».
Gagauziya soţial işçilerini yortuylan kutladı Düz-Ava türkü hem oyun ansamblisi
Moldovanın hem Gagauziyanın en mekalı haberleri GRTnın Telegram kanalında!