Komrat kasabasının Kemal Atatürk adına türk bibliotekasında geçti olay , angısıadandı gagauz avtonomiyasının 30-cu yıldönümünä hem resim konkursun «Yaşa halkım» adlan çıkışlar belli edildilär, enseycilär ödüllendilär. Bu olaya katıldılar Türkiya konsulun Komratta yardımcısı Gülber Süriya, Gagauz avtonomiya kurulmasında aktivistlär, okullkarın üürenicileri hem üüredicilär.
Olayın, angısı adandı gagauz avtonomiyasının 30-cu yıldönümünä, pay alannar susmak minutaylan andılar insannarı, angıları katıldılar Gagauziyanın kurulmasına- Stepan Topalı, Mariya Maruneviçi, Dmitriy Savastinı hem başkaları. Gagauz Avtonomiyasının kurulmasında aktivist Andrey Çeşmedji annattı o olyalar için. O urguladı, ani gagauz dilin, adetlerin hem kulturanın koruması lääzımnıydı.
«Kantara koyardık dil hem inan. Da bakardık ne taa kaavi. Elbetki, dil»,- aktivist Andrey Çeşmedji annattı.
Ayırı hak statusu için kanonun kabletmesi lääzımnıydı neçinki Moldovada politika durumu lääzımdı pek diişsin, söledi türk bibliotekanın başı Vasilisa Tanasoglo: «Belli edildilär avtonomiyanın sınırları, ayırıldı başkan, GHT, kabul edildilär ofiţial simvollar.Avtonomiyanın kurulması verdi kolaylık gagauz halkına koruma kendi istoriyasını,dilini, kulturasını».
Gagauz avtonomiyasının 30-cu yıldönümünnän olayın pay alannarını kutladı Türkiye devletin konsulun Komratta yardımcısı Gülber Süriya. O belli etti Suleyman Demirerlin zaametini avtonomiya kurulmasında.
«Türkiye halkı hem devleti oldu hem olacek ta gagauz kardaşların yanında hem yardım edecek ileriya dooru da. Kutlȇȇrım hepsini avtonomiya kurulmasının 30-cü yıldönümünnän. Hepsinä saalık, uygunnuk, raatlık hem başarları ileriya dooru da»,- Türkiye devletin konsulun Komratta yardımcısı Gülber Süriya söledi.
Bu olayın süresindä belli oldular «Yaşa halkım» resim konkursun çıkışları, angısına katıldılar üürenicilär bütün regiondan. İlk erleri aldılar Darya Kol hem Kseniya Topal Çadır kasabasından hem da Veronika Guboglo Komrattan. Hepsi enseyicilerä baaşışlar hem anmak kiyatları verildilär.

