Kongaz küüyün Varvara Topal adına gimnaziyasının iki üçüncü klasların üürenicileri gösterdilär gagauzların evelki milli oyunnarını. Nesoy oyunnar için laf gider, annadȇr Polina Barbova.
İniţiativa göstermää gagauzların evelki milli oyunnarını çekiler Kongaz küüyün Varvara Topal adına gimnaziyası gagauz dili üüredicisindän Kovrikova Pelageyadan: «Benim anam 84 yaşında. Dolaşmaa onu gelerlär, nicä onun akrannarı, ölä da taa büük yaşta insannar. Da, te bir gün onnar çekettillär lafetmää oyunnar için, onun için, nicä gadjetlar belli ederlär insanın yaşamasında. Biraz taa sora, onnar çekettillär lafetmää oyunnar için, angılarınnan onnar küçüklüündä oyunaardılar. Beni bu pek meraklandırdı. Düşündüm, ani lääzım onnarı derindän üürenmää, ne da ileri dooru yaptım».
Pelageya Andreevna çizgiledi, ani işidip lafedärkän karılarlan, kimi oyunnarın adlarını yazdı, başkalarını sa buldu akademiin Zanet Todurun kiyatlarında hem da enţiklopediyasında. Bu fikirlän Pelageya Kovrikova danıştı üürenmäk okulun öndercisinä Arnaut Mariyaya, angısı kendi sırasında tutturdu kolegasını.
«Açan Pelageya Andreevna yaklaştı bana bu soruşlan, bän pek sevindim, neçinki bu nesä eni. İsteerim çizgilemää, ani nesoysa da zor olmasınnar eni ideyalar, onnar her zaman meraklı. Bän söledim ona, ani bizdä örnek yok buna. Nicä yapayacan, ölä da olacek, sade sän lääzım bunu içindän geçiräsin, da sade ozaman olacek ölä, nicä sän isteersin»,- Pelageya Kovrikova çizgiledi.
Kongaz küüyün V.Topal adına «GAGAUZ KORAFLARI» muzeyi başı Marina Grozdeva çizgiledi, ani üüredicilär mutlaka lääzım annatsınnar bunnar için üürenicilerä, onnar sa kendi sıralarında annadaceklar hem da göstereceklär başaklarına, bu sırada uşaklarına da.
«Eеr biz zamandaşta bunun için annatmarsaydık uşaklara, ozaman onnar da annatmayaceklar kendi uşaklarına. Onun için da , bizim baş davamız sayılȇr o, ani annatmaa, barabar uşaklarlan oyunamaa, da sade bölä oyunnar yaşayaceklar»,- Marina Grozdeva çizgiledi.
Kongaz küüyün Varvara Topal adına gimnaziyasının iki üçüncü klasların üürenicileri gösterdilär gagauzların 10 — dan zeedä evelki milli oyunnarını.
Moldovanın hem Gagauziyanın en mekalı haberleri GRTnın Telegram kanalında!