Gagauziyanın kimi küüylerindä hem kasabalarında canavar ayın 6-dan natura gazını sündürdülär. Neylän bu iş baalı hem engel etmeer mi durum yaşayannara, annadı bizim tel-n gropamız.
Gagauziyanın kimi yaşamak punktlarında bir vakıda natura gazını sündürdülär. Yaşayannarın kimisini bu durum raatsız eder. Haliz o aylelär, neredä natura gazını kullnȇrlar diil sade imekleri hazırlamaa, amma su isıtması için dä, nışannȇȇrlar yaşayannar.
«Aldım bir elektrik plitacıı da onunnan durumdan çıkȇrım. Bän büük kasabada yaşadım, amma bölä durumnar ilk sıra karşı gelerim. Neçin bukadar uzun zamana sündürdülär gazı? 5 gün! Bilmeerim, beki ölä lääzım, amma bu pek islää iş diil».
«Gazsız pek zor. Uşaklara sabaylen bişey imek için hazırlayamȇȇrız. Kuru-kuruya bişiylär iyerlär. Sora da poliklinikalarda kaçınaceklar».
«Zoorca, amma kolayını bulȇrız. Var ilerki kotlin, onunnan durumdan çıkȇrız».
«Pek zor. İslää, ani makar sölerlär sündüreceykän. Amma hep okadar zorca».
«Bana pek kolay, var balonum , onu dolu tutȇrım. Lääzımsa dışarda kaurȇrım. Bana pek uygun».
Yaşayannarın kimileri nışannȇȇrlar, ani kayıl bir iki gün gazsız dayanmaa, amma kışın gaz verän kurumun işi islää işlesin lääzım.
«Ölä lääzım olsun. Eer yapmarsaydılar profilaktika kışın ortasında sora problemalar peydalansınnar yakışȇrlar. Sayȇrım ani herbirindä şavk var, elektriin yardımınnan bir-iki günä durumdan çıkmaa var nicä».
«Sayȇrım ani bu diil uzun vakıda, hem durumdan çıkmaa kolay. Var sobalar, dışarda var nicä kotlon koymaa. Bölä durumda onnar trubaları paklasınnar lääzım, çünkü bu en önemni resursların biri. Kış yaklaşȇr hem sora suuk zamanda problemalar olmasınnar deyni şindi bu işi yapmaa lääzım. Onuştan sayȇrım, ani bundan problema yapmaa diil lääzım».
Gagauz gaz kurumun haberlerinä görä kimi küüylerdä hem Komratta gazı yaşayannara deyni canavar ayın 10-da vereceklär. Sündärmeya sebep oldu plannanmış profilaktika işlerin geçirilmesi.
Moldovanın hem Gagauziyanın en mekalı haberleri GRTnın Telegram kanalında!