Gagauziyada «Genel diktant gagauz dilindä» akţiyası geçti. Burada toplandılar hepsi, kimä yakın gagauz dili. Adet olarak, bu olay baalı gagauz dilin ilelremesinnän hem korunmasınnan. Çadırda diktantta pay aldı 150 kişiyä yakın.
Bu yıl genel diktantı 5 merkezlerdä yazdılar. İlk keret akţiya Çadırda Mihail Çakir adına liţeyindä geçti. Burada diktanta 150 pay alan katıldı- dolayın üüretim kurumnarından üürenicilär hem üüredicilär. Genel diktantın yazılması için Nikolay Tanasoglunun «Yaamur için dua yaratması ayırıldı». Bakmayarak dalgalanmaklara, pay alannar daavayı başardılar, urgulayıp ,ani tekst onnara deyni diildi pek zor.
«O bana deyni kolay geldi. Neçinki bän pek beenerim ilerletmää gagauz dilini hem bana meraklı geldi — nesoy bän yazacam diktantı — zor mu gelecek, bän ilk keret buradayım -sevinerim, ani yazȇrım diktantı».
«Sevinerim,ani katıldım ölä meraklı olaya — düşünerim, ani üüredicilerdä oldu kolaylık yazmaa, diktant diildi okadar zor, ama hep okadar vardı kimi laflar zor — orfografiya kurallarını uşaklar lääzım bilsinnär, orta, bekim biraz zordu sintaksis uurundan tekst — var çok laf çevirtmesi, katlı cümlelär var».
«Bän istedim pay almaa bu diktantta, neçin deyni isteerım ilerletmää bizim gagauz dilimizi, taa çok lafetmää onda hem da bana diildi pek zor».
«Pek kolaydı, neçinki o yardım eder bizä tutmaa akılında gagauz dilini dä bilmää onu».
Bölä olaylar diil sade bilgileri kontrol eder, ama uyandırêrlar meraklıı ana dilinä, taa kaavi yapêrlar evladların arasında baalantıları hem kurêrlar saygıyı dedelerä, söledi Mihail Çakir adına liţeyin gagauz dili üüredicisi Anna Militan: «Diktant diildi zor hem baalıydı bizim gagauzlara deyni en acıyan (soruşa), ani yaamur bizim toprakta da ozaman bizim soframız dolu olacek. Bana kalsa, geçti ii, pek islää, umutlanȇrım, ani bizim musaafirlär islää burada kendini duydular.. Bana kalsa bu önenmi te ondan, ani beendirmää ana dilimizi, gagauz dilimizi, ani utanmamaa, lafetmää, yaşamaa onunnan. Diil sade kendimizä, orada derstä, ama yaşamaa onunnan sokakta da, bütün dünneyä bildirtmää, evdä dä, iştä dä».
Mihail Çakir adına liţey başı Valentina Çebotar urguladı, ani diktantta pay almak- o bir önemni adım gagauz dilin ilerletmesindä. Genel diktantın tarayannarını iki kategoriyada belli edeceklär — üürenicilerin hem ayırı büüklerin arasında. Kim kazanacek ilk erleri, onnara diplomnar hem para premiyaları verileceklär.
Moldovanın hem Gagauziyanın en mekalı haberleri GRTnın Telegram kanalında!