GHT oturuşu süresindä Gagauziya M.Maruneviç adına BAM öndercisi işini götürän İrina Konstantinova, 2024-cü yılda merkezlän geçirilän iş raporunu açıkladı.
Gagauziya M.Maruneviç adına BAM öndercisi işini götürän İrina Konstantinova 2024-cü yılda gerçeklenmiş iş raporunu temsil edärkenä nışannadı, ani merkezin uzmannarınınnan yılın süresindä yapıldı çok iş, angıları dooruduluydular gagauz dilinin, kulturasının hem istoriyasının korunmasına hem ilerlemesinä. Yılın süresindä hazırlandılar hem tiparlandılar sözlüklär, üürenmäk kiyatları hem türlü başka kiyatlar. Geçirildilär türlü konferenţiyalar hem ekspediţiyalar.
«Geçän yıl 28 toplantı geçirdik, 4 taanä büük konferenţiya yaptık. Bunnar pek önemni işlär diil sade Gagauziyamızda, ama çıkȇrız yurt dışına da»,- İrina Konstantinova açıkladı.
2025-ci yılda BAM neetlener ötää dooru bu işleri gerçeklemää hem eni proektleri geliştirmää, onnarın birisi bilim doktorlarını hazırlamak proekti, nışannadı İrina Konstantinova: «İsteeriz bizim araştırıcılarımıza, kimin doktorluk uurları taa yok, onnara ödek vermää, ki onnar doktoranturayı başarsınnar. Önemni bu insannarın potenţialını Gagauziyada üüseltmää, çünkü bilersiniz, ani herkezimizin universitet bitirdiimiz var, ama doktoranturaya 1000 kişinin arasından sade 20 kişi giderlär, bitirer da sade 1%. Pek çok insan bunu yapmaa isteer, ama çok paalı, onuştan siz verärseniz izin gelän yıl biz bu işi gerçeklemää isteeriz».
2015-ci yıla plannanmış işlerin arasında bulunȇr gagauzologiya uuruna doorudulu proektlerin gerçeklenmesi dä.
«Bilersiniz, Gagauziya genç bir dal bilim uurunda, onuştan istoriyamız, kulturamız, etnografiyamız, dilimiz lääzım üüsek uurda ötsün diil sedece Gagauziyamızda, ama Moldova içindä. Onuştan biz Gagauziyada lääzım bir strategiya kuralım, da onu 5 yılda üüsek uurda çıkaralım»,- nışannadı BAM başı Konstantinova.
Proektlerin arasında bulunȇr gagauz halkının peydalanması teoriyası temasına görä halklararası kongresin geçirilmesi hem başka devletlerdä yaşayan gagazların küüylerinä ekspediţiyalarlan çıkmak. Hepsi bu neetleri BAM gerçekleyäbilecek birlik olarsa, nışannadı İrina Konstantinova: «Sadece lääzım çalışmaa birliktä. Açan birliktä olacez, ozaman gagauzluk da olacek , gagauz dilimiz dä olacek, istoriyamız da olacek, ama gösterelim gözäl bir örnek hepsinä».
Başarılı hem faydalı iş için BAM uzmannarını şükür etti GHT deputatı Dmitriy Manastırlı.
«Sanȇrım, ani 24-cü yıl pek faydalıydı, umutlanȇrım, ani 25-ci yılda da siz komandanızlan işinizi ileeri aydayaceenız. Dileerim kuvet»,- dedi deputat.
İş raporunu temsil edärkenä İrina Konstantinova nışannadı, ani 2024-cu yıldan başarılmadık proektlär da 2025-cidä ilerleyeceklär.
Avtor: A. Terzi, operatorlar: S. Georgiev, V. Kıssa, montaj: İ. Rezuneţ
Moldovanın hem Gagauziyanın en mekalı haberleri GRTnın Telegram kanalında!