Gagauziya Halk Topluşun temsilcilerin hem Moldovanın merkez kuvetlerin aralarında annaşma kimi soruşlarda, ne baalı avtonomiyanın Parlamentinä deputatları seçmesinnän belli edildilär. Açıklamalarda Kişinövda prezidentin administraţiya temsilcileri, Moldovanın Parlamentin, Merkez seçim komisiyanın hem avtonomiya deputatları pay aldılar. Annaşmak proektin kararını HT deputatlarına tezdä teklif edeceklär. Nicä yaşayannar bu durumu notalȇȇrlar seçim grupamız üürendi.
Avtonomiya yaşayannarı GHT-na seçim durumuna bakışları başkalanȇrlar. Kimileri sayȇrlar, ani politika krizisindä en dooru çıkış — o dialog kuvelterin aralarında. Başkaları, ani temiz hem uslu çıkışı politika çekişindän olmayacek.
«Nesä bekim dooru yapmadılar, ama merkez kuvetlerinnän lääzım dostlaşmaa. Açıklasınnar durumu, çıkış herzaman var. sadä lääzım annaşmaa».
«Bäz sayȇrım, ani kuvetlär lääzım annaşsınnar. Biz onnarı ayırȇrız, ama nesoy çözümneri yapaceklar, düşünsünnär».
«Seçimnär vakıdında düşer olsunnar, neçin geçirerlär».
«Bana kalsa, durum çözüldü. Komrat Kişinövlan buluştu, lafettilär. Durum lääzım çözülsün ».
«Annayamȇȇrım seçimnär soruşu angı uurda bulunȇr. Hep nesä söleerlär, annadȇrlar, ama bişey çözmeerlär. Çıkışlar yok taa».
«Bu deputatların çalışmak zamanı bitti, seçimnär dä olmadalar. Nicä onnar kendilerini götüreceklär, ölä dä Gagauziya korunacek».
«Deputatlarımız bişey kararlamȇȇrlar, sade çekişmää bilerlär».
«Konstituţiya var, ona görä bişey yapmarsalar, başka kurumnara lääzım danışsınnar».
«Politikayı gözletmeerim».
«Deputatlarımızı tutturȇrım, ama kuvedä gelsinnär onnar, kim insana izmet edecek, diil kendi soruşlarını çözsünnär. Kuvetlär mutlaka lääzım annaşsınnar da bir karara gelsinnär».
«Problemaya kendi deputatlar getirdilär, çünkü zamannan Devletin kanonunda diişilmeklerinä sayıp çıkmadılar. Şindi biri-birini kabaatlı bulȇrlar, ama kabaatlı hepsi. Şükür, ani çözümü buldular. Dokument 95% hazır. Düşünerim, ani güzä seçimnär bizdä geçeceklär».
GHT deputatların seçimneri geçirmäk çıkışı belli olacek, açan HT deputatları proektin son kararı belli edeceklär, parlamentin temsilcilerinnän hem Moldovanın Merkez seçim komisiyasınnan taa buluşmalar geçirileceklär.
Moldovanın hem Gagauziyanın en mekalı haberleri GRTnın Telegram kanalında!