Kişinöv kasabasında geçti Moldova çempionatı estetika gimnastikasında. O topladı en ii gimnastları devletin herbir köşesindän. Onnarın aralarında «Academy Brilliance». Kоmratlılar kazandılar gümüş ödülleri.
«Brillians Akademy» klubun sportçuları bu kasabayı tanıttırdılar 6 komanda 45 gimnastlan türlü yaş kategoriyalarında devletin yarışmalarında- en küçüklerdän becerikli sportçularadan, angıları üüsek uurda gösterdilär kendilerini matta. Her keret pay almak yarışmalarda- sıkı sınışların çıkışı, disţıplina hem çok saat zallarda, nışannadı klubun başı Anna Kudreţ: «Bitki iki afta uşaklar zalda her gündülär. Bitki afta pek önemniydi. Hepsi bu iş verdi kendi çıkışlarını. Biz geldik evä Gagauziyaya hodulluklan, neçinki beş bizim komandamız getirdilär evä gümüş ödülleri. Kimi kategoriyalarda bizdä vardı 3-4 komanda konkurent. Biz altını taa getirmedik, onnarı kablettilär taa kaavi komandalar, nekadar biz, bu Kişinöv. Bizä lääzım taa sıkı işlemää, var taa nereyi büümää. Hem bizim bir ünior komandası evä getirdi bronz ödülünü».
Yarışmalar geçtilär kızgın: zor kompoziţiyalar, artistika elementleri — juri notalardı herbir elementi. Sportçular Komrattan gösterdilär kendi karakterini, becermeklerini, hem komanda ruhunu, urguladı klubun treneri. 5 komanda iki günün süresindä kazandılar serbest ödülleri.
«Muzikayı ayırȇrız maasuz uşaklara deyni, onnarın kolaylıklarına görä, sınışları iki ay ileri başladık geçirmää, iki afta yarışmalaradan her gün işledilär, da bu getirdi ii çıkışlara. Trener gibi söleyecäm, ani var taa ne yapmaa, erlem hep bölä ilerledecez, hep bu uurda, çıkışlar olaceklar taa üüsek. Esaba alacez yannışlıkları, ama ölä uşaklar pek ii pay aldılar. Erlem onnar çıktılar mata da hepsini yaptılar, bu onnarın taraması»,- nışannadı trener.
M. Eminesku liţeyın sport zalasında her keret muzika, şiritlär hem gülüş. Maasuz buradan çekediler gimnastların sport yolu. Klubta hazırlanmalar durgunmayarak giderlär, gimnastikada ensemesi, fizika tarafından hazırlanmak, tehnika, kompoziţiyaların koyulması. Herbir komandanın var kendi karakteri, stili, ama hepsini birleştirer sevgi işä, hem istemäk taramaa, nışannȇȇrlar klubun temsilcileri. Taa becerikli gimastlar barabar trenerlarlan yardım ederlär çekedennerä herbir eni elementi üürenmää, ki çıktıynan yarışmalarda üüsek uurda göstermää hazırlanmış programayı. Nicä nışannadılar uşaklar, yarışmalar kaaviydi, ama onnar yaptılar konulmuş davaları da getirdilär komandanın kumbarasına ödülleri.
«Biz pay aldık Moldova çempionatında, ikinci eri kazandık. İlk günü pay aldık diil prost, ikinci günü taa ii gösterdik kendimizi».
«Biz yarışmalaradan ii hazırlandık, da hepsini yaptık üüsek uurda».
«Biz hazırladık duygulu hem gözäl muzikayı da bizim nomerimiz pek isläydi».
Çoyu pay lannarına deyni bu çempionat ilkti onnarın karyerasında, angısını onnar üüsek uurda geçirdilär. Taa büük gruppalara deyni, bu kolaylık tutturmaa kendi poziţiyalarını başka klubların aralarında hem millet arenasında, nışannadı klubun başı Anna Kudreţ. İkinci er komandaların aralarında- bu diil sade sayı protokolda, bu bütün sistemanın tanıtması, neredä çalışȇrlar professionallar, hem uşaklar üürenerlär taramaa, dostlaşmaa, urguladı Anna Kudreţ.
«Bu yarışmalar pek zordular, nicä emoţional tarafından, ölä da fizik tarafından, ama bizim uşaklarımız yazın dinnendilär sade iki afta. Soram döndülär geeri sınışlara, zerä bilärdilär, ani var yarışmalar, angıları yardım edeceklär onnara kapamaa kalendar yılını. Hem kazanmaa sport razrädlarını»,- nışannadı Kudreţ.
Şimdi sportçular hazırlanȇrlar eni yarışmalara, duygulara hem taramaklara.
Moldovanın hem Gagauziyanın en mekalı haberleri GRTnın Telegram kanalında!