Svetliy küüyün gimnaziyasında yakın vakıtta başlayacek çalışmaa sanitar bloku. Bu Moldovada 70 üüretmäk kurumnarındam birisi, angılarında Üüretmäk ministerliin iniţiativasına görä düzülerlär okullarda sanitar odaları.
Svetlıy gimnaziyasında, angısı bu yıl 55 yıldönümünü bakêr, enilener infrastruktura. Diil çoktan burada koyuldu güneş stanţiyası 14 kilovatlık, dedi gimnaziya başı Svetlana Boyacı. Onun laflarına görä, bitki analiz gösterdi, ani bu sistema bütündän kaplêêr üüretmäk kurumun ekektrika harçlarını, paraları sa, ne kalêr, okulun başka lääzımnı işlerinä doorudaceklar.
«Bu dışandan durum, okukun fasadı, paalı proekt, angısına lääzım çok para. Bizdä var smeta dokumentleri, audit, yapının ekspertizası da yapılı. Umut ederiz pay almaa nesoysa konkursta da yapmaa bu isleri»,- dedi gimnaziya başı Svetlana Boyacı.
Boyacı Svetlananın laflarına görä, okulun kolektivi — o büük bir profesional komandası. Burada çalışêr 23 üüredici, 23 administraţiya hem tehnik uzmannarı. Üürener bu gimnaziyada 253 uşak. Hep ölä okul pay alêr türlü üüretmäk proektlerindä. Geçti yılın sentäbr ayında gimnaziyada yapıldı mini-futbol eri. Paralar bu iş için koyuldular türlü erlerdän, ama başarmaa proekti yardım etti ARBOM bulgar cümnä kurumu.
«Bän isteerim sölemää, ani üüretmäk proţesinä çok dikkatlık veriler, o üzerä biz pay alêrız proektlerdä hem barabar çalışêrız hepsinnän, kim bizä teklif eder»,- dedi gimnaziya başı Svetlana Boyacı.
Yakın ginnerdä üçüncü katta sanitar bloku başlayacek çalışmaa. Bu barabar proekt üüretmäk ministerliinän.
«Bu proekt finanslanêr üüretmäk ministerliinän. Pek şükürüz. Remont gözäl zamandaş, bölä bizdä yoktu»,- Svetlana Boyacı dedi.
Gimnaziya ilerleer hem diişer, çalışêr kurmaa ii koşulları üürenicilär hem üüredicilär için.
Moldovanın hem Gagauziyanın en mekalı haberleri GRTnın Telegram kanalında!