GRT CK gezintidä S.Kuroglo adına gimnaziyasından üürenicilär bulundular. Televideniye hem radio studiyalarında onnar göräbildilär, nicä programalar, haberlär yazılȇrlar.
S.Kuroglo adına gimnaziyasının 7–9-cu klasların üürenicileri seftä gördülär, nicä GRT kompaniyasında TV hem Radio işleerlär. Kompaniyanın çalışannarı uşaklara televideniyanın hem radionun işlemäk sistemasını açıkladılar, kameraları, mikrofonnarı, studiya tedarlıklarını hem montaj odalarını gösterdilär. Üürenicilär meraklan gözlettilär, nicä jurnalistlär süjetleri hazırlȇȇrlar, götürücülär programaları götürerlär, televizion operatorları işleerlär.
«Herzaman meraklanardım, nicä işleer insan bu zanaatlarda».
«Bana kalsa, en zor – aparaturalar ardında yayını yazmaa».
Özel meraklan musaafirlär «intervyu yazmasına» katıldılar. Onnar kendilerini jurnalist rolündä denedilär – soruşları sordular, respondentin cuvaplarını yazdılar – hepsini bunnarı da kameraya yazdılar. Çoyuna deyni hepsi bunnar ilk denemeklär mikrofonun hem obyektivin önündä oldular.
«Bän bunnarı hepsini televizorda gördüm, ama içindän başka bir dünnä».
«Operator da kendimi denedim, respondent ta oldum. Meraklı bişey».
«Оperator – nicä resimci».
Üürenicileri öndercilik edän Natalya Varban söledi, ani butakım buluşmaklar yardım ederlär uşaklara zamandaş dünnenin tehnologiya dünnesini, ilerleder onnarda meraklıı jurnalist, götürücü, operatorluk zanaatlarına.
«Uşaklara teklif ettim bu gezintiyi, çünkü onnar zanaatı seçmäk uurunda bulunȇrlar»,- Natalya Varban söledi.
Natalya Varban adadı, ani üürenicilerin butakım gezintileri tradiţional olaceklar.
Moldovanın hem Gagauziyanın en mekalı haberleri GRTnın Telegram kanalında!