Gagauziya Radio Televizionu cümnä kompaniyası genişleder işbirlii Deutsche Welle mediaholdinglan. Laf gider ortak proyektlär için. Yakında bizim kompaniyanın efirindä DW programmaları yayınnanaceklar. Bu üzerä DW zaametçileri bulundular GRT- dä, neredä buluştular onun başlarınnan.
Deutsche Welle açȇr eni kolaylıkları GRT için — GRT efirindä eni programmalar olacȇk. Kompanyanın başın erinä çalışan Yaroslav Bulgaru açıkladı, ani bu önemli bir adım regional televizionun gelişmesi için. O dedi ki bu bir kolaylık üüseltmää kontentin kalitesini hem siiredicilerä teklif etmää taa geniş bakış türlü olaylara.
«Yakın vakıtta imzalanacek kontrakt Deutsche Welle hem GRT arasında, bunun çerçevesindä GRT erleştirecek türlü kontenti, angısını biz alêrız hem alacȇz Deutsche Welle kompaniyasından. Bu etapta biz aldık artık 30-dan zeedä film, şindi bu filmlerä yapılêr titrular, Audiovizual kodeksinä görä biz zorundayız titrarlamaa onları rumın dilindä, onun için yakın vakıtta bu iş bitecek hem biz başlayacȇz göstermää bu kontenti bizim avtonomiyanın siiiredicilerinä, hem diil sade avtonomiyada — bütün Moldova bakabilecek. Umutlanȇrım, ki kontent olacek çeşitli hem meraklı»,- Yaroslav Bulgaru açıkladı.
Deutsche Welle kompaniyasınnan işbirlii – bu sade kontent deyişimi diil, ama da kolaylık gelişmesi için bütün regional media sferasında, dedi Deutsche Welle informaţiya bölümü başı Dmitriy Haykin. O urguladı, ki Deutsche Welle interesli dostlukta regional yayıncılarlan hem hazır paylaşmaa kaliteli hem kontrol edilmiş kontentlan.
«Bizim için çok önemli bulunmaa burada, işbirlii yapmaa büük media kompaniyalarlan . Çok sevineriz, ki başlȇrız işbirlii sizinlän hem ki Gagauziyada siiredicilär da görecek bizim programmalarımızı. Umutlanȇrım, ki onlar beeneceklär hem uygun olacek dünnä standartlarına. Bu sebeptän biz uzun zamandır bulunêrız Moldovada»,- dedi Deutsche Welle informaţiya bölümü başı Dmitriy Haykin.
Bekleniler, ki bu işbirlii verecek kolaylık Gagauziya siiredicilerinä almaa taa çeşitli hem internaţional heberleri, hem da güçlendirecek profesional standartları erli jurnalistlerin işindä.
«Moldovada biz lafederiz türlü temalar için, ama biraz başka türlü, Romaniyada, Türkiyedä, Polşada, Serbiyada hem başka devletlerdä. Onun için biz yakınız – ki olmamaa uzak ‘marslılar’ gibi, angıları annadêrlar burada hiç interesli olmayan işleri»,- dedi Dmitriy Haykin.
GRT başı bildirdi, ki kompaniyanın gelişmesi için iş ilerleyecek, bu neetlän kurulacȇk işbirlii da başka media strukturalarlan.
Moldovanın hem Gagauziyanın en mekalı haberleri GRTnın Telegram kanalında!