Mayın 14-16 Azerbaycanda, Baku kasabasında Halklararası konferenţiya geçti. Türkiyenin Üsküdar universiteti üüredicisi, dicital media uurunda uzman Enes Akdag «Güneşä karşı» çizgi filmı hem «Çemrek film» animaţiya studiyası için konferenţiyada annattı.
Türkiyenin Üsküdar universiteti üüredicisi Enes Akdag Halklararası konferenţiyasında söz tuttu. Bakuda gagauzlar için, «Çemrek film» studiyası , «Güneşä karşı» çizgi filmi için annattı. Bu önemni proektin TİKA-nın yardımınnan başarılı olması için söledi. Aaraştırmasında Enes Akdag gösterdi, ne türlü bu çizgi filmnär uşaklara gagauzluu annamaa yardım ederlär.
«Bizim filmizi temsil ettilär Bakuda. Bu işi yaptı Türkiyenin Üsküdar universiteti üüredicisi Enes Akdag. Ona pek şükürlüüs.Filmi sıcak karşilamışlar»,- annattı Vera Sibova.
Avtonomiyanın uşak başçalarında «Çemrek film» studiyasının çizgi filmnerini üüretmäk proţesinä aktiv giriştirerlär. Personajların yardımınnan küçük yaşta uşaklar eni lafları üürenerlär, gagauz halkının kulturasınnan, istoriysınnan tanışȇrlar.
Kelepercii, Pirkucuu, Filçuyu hem başka kahramannarı Gaggauziy uşakları artık sevdilär. Siirederäk bu çizgi filmini, uşaklar gagauz dilini üürenerlär. Eni laflar akıllarında kalȇr. Yavaş-yavar onnarı sözlerinä giriştirerlär. Kimilerinä zor geler, başkalarına biraz taa kolay, ama iş ilerleer. Türküleri dä üürenerlär hem dä çalȇrlar.
«Biz çalışerıs. Bar taa çok ideyalar. Bar bölümnär aylelär için, Kasım örtusu için»,- nışannadı Sibova.
«Güneşä karşı» çizgi filminin ilk seriyası 2024-cü yılın avgustunda tanıdıldı. Artık 17 seriya var. «Çemrek film» studiyası eni seriyaları hazırlȇȇr.
Moldovanın hem Gagauziyanın en mekalı haberleri GRTnın Telegram kanalında!