Gagauz Eri regional resim galereyasında güz sergisi açıldı. Burada gösterili 40 resim, angıları türlü janralarda yazılı.
Kendi işlerini insannara gösterdilär 11 resmci Gagauziyadan, angıları her yıl geçirerlär adetçesinä iki sergi — güz hem ilkyaz sergileri. Burada var nicä görmää resimneri türlü sferalardan hem türlü janralardan.
Nicä söledi anılmış resimci Anri Matiss “ Herbir tablo lääzım tek olsun kendi sırasında. Lääzım olsun eni resim insanın fikirindä”. Hep ölä güz sergisindä bulmayacan bir dä birtürlü resim. Herbiri kendiycesinä unikal hem şaşılacek. Herbir resimci savaştı göstermää ne onun fikirindä var – Bucaan peyzajlarını, güz zenginniini, altın horozu, bucak natürmortunu, gagauz karılarını hem elbetki beygirleri,angıları evelki zamannardan gagauzların yanındaymışlar. Nicä nışannadılar serginin pay alannarı, bölä sergilär vererlär kolaylık taa sık buluşmaa, kendi becermeklerinnän hem dugularınnan paylaşmaa.
Pötr Fazlı, resimci, nışannadı: «Bu sergi nicä bir yortu, angısı bizim insannarımızı biraz destekleyecek, ki onnar düşünsünnär ne istemiş bu resimci yapmaa, da bitkidä bekleyecez cuvabı ondan, ne o istedi göstermää. Bizä önemni bilmää ne düşüner insan, bakarkan bizim tablolarımıza».
Födor Duloglo çizgiledi: «Sergi islää oldu. Bän beendim, ama bitki vakıtlar neçin sä sade güz hem ilkyaz sergilär geçiriler. 2000-ci yılda Kipraya gittik , nereyi dä gitmedik, ama pandemiya çeketti da hepsi durgundu. İsteeriz taa çok türlü sergilär olsunnar».
«Haliz resimci bir keret ta görmeer dünneyi osoy, nesoy o var, neçinki o diil resimci» söledi ingliz yazıcısı Oskar Uayld. Bunun için serginin açılışında pay alannar diil sade kendi işlerini temsil ettilär, ama bakardılar kendi kolegaların tablolarını da. Diskusiyalar pek aktiv geçtilär, neçinki herbir resimä avtor koydu kendi canını hem onu, ne isteer görmää siiredici. Pay alannarın arasında vardı genç talantlar da.
«Resimci olarak isteeriz taa çok siiredici olsun hem insan, angıları bizim resimnerimizi tanısınnar. Biz işleeriz, ki halk bilsin kendi resimcilerini. Savaşȇrız taa çok tabloları göstermää»,- annattı resimci Stepan Jelezoglo.
«Bän sayȇrım, ani bölä kultura yaşaması avtonomiyada ilerlesin lääzım. İnsan lääzım aktiv gezsin konţertlerä, galereyalara, teatrulara. Bu terbieder , üüreder düşünmää, duygularlan, enegiyaylan dolmaa. Neçinki herbir avtor, angısı resimneer, gösterer nesoy sa ideyayı, angısını siiredici görsün lääzım»,- nışannadı Natalya Vornikova, resimci.
Nicä nışannadı galereyanın başı, her yıl tanışmaa gagauz resimcilerin yaratmalarınnan gelerlär diil sade turistlär, ama avtonomiyanın yaşayannarı hem üüredicilär üürenicilärlän . Hepsi, kim isteer görmää resimneri, var nasıl gelsinnär galereyaya her gün pazertesi gündän cuma gününädän.