Gagauziyanın regional galereyasında açıldı «GÜZ SERGİSİ-2025».Ekspoziţiyay ıkurdu «GAGAUZ-ART» resimcilerin kurumu. Güz tematikası birleştirdi hepsi yaratmaları,gösterip güzün şıralı renklerini.
Ekspoziţiyaya çıkarıldı 41 yaratma türlü janralarda,bu sayıya girdilär portretlär, natura resimleri, animalistika hem stilistika kompoziţiyaları, yaradılı yaa hem pastel boyalarınnan. «GAGAUZ-ART» birliin azalları paylaşȇrlar,ani onnar için önemli çıkrmaa sergilerä kendi yaratmalarını hem kurmaa duygu balantısını siiredicilärlän resimnär aşırı.
«İsterim teklif etmää yaşaynnara diil sade Komrattan,ama bütün Gagauziyadan gelsinnär sergiya, neçinki tablolar aşırı biz siiredicilärlän lafederiz, dialogu getireriz, da isteriz paylaşmaa içindeki dünnämızlan, neçinki bileriz,ani resimcilär biraz taa başka türlü görerlär dolayda dünneyı. Siiredicilär duysunnar deyni bu iilik, sıcaklık atmosferasını –teklif ederiz.Sanȇrım,ki herbir cana görä bulunacek burada yaratma».
«Bän ii bir duyguylan bulunȇrım, ki karşılaştım kollegalarlan, resimcilärlän.Ölä gözäl bir duygu, sevinmelik, neçin ani herkezi kendi yaşamasını götürer kendi bölgesindä. Biz bölä karşılaştıynan, göreriz biri-birimizi, çalışmalarını, resimnerini göreriz.Hem biri-birimizi göreriz, hem insannar».
«Olmuş bir interes sergi.Bundan sora bizim yaşayannar görecek bu sergidä.Bizim duygular geçsin bizim insannara, kim dalgalattırȇr bizim incäzanaatımızı.Herzaman sevineriz,açan salalarda çok insan var, çok geler,kim bakȇr bizim zanaada, ötää dooru bekler bizdän taa çok iş».
«Büün doluyum energiyaylan,sevinmeliklän.Herzaman,açan sergilerimiz geçer, gelerim büük havezlän, hazırlanȇrım cannanmaa başka resimnerä da».
Kultura bakannın başı Marina Semönova üüsek notaladı sergiyi hem şükür etti resimcileri onnarın gözäl işi için.
«Bir şüpesiz var nicä söleyim,ani burada toplandı kaavi elli ustalar,angıları gün-gündän illerlederlär kendi işini,bu kolaylıklan da illerlederlär gagauz halkın kulturasını.İildip başımı isterim sölemää herbir resimciya saa olun saa olun, ani işlesiniz, bakmȇrsınız bir da zorlaa, ani kendi fikirinizi,canınızı,düşündüklerinizi, resimnärlän çıkarȇrınız dünneya»,- Marina Semönova nışannadı.
«GAGAUZ-ART» birliin başı Pötr Fazlı taa urguladı,ani lääzım kaavileştirmää incäzanaat uurunu da genişetmää resimcilerin kolaylıklarını.
«Teklif ederim ki alınsın sergilerdän, kimisä avtordan yaratmalar Kultura Bakannıı için, Resim galereyası için. Bendä bölä teklif. Diplomnar bizdä toplandılar, bu elbetki ii,dooru da, destek da.Ama olsaydı başka da bir destek. Düşünerim,ki kollegalar bununnan kayıl olaceklar»,- Pötr Fazlı urguladı .
«Güz Sergisi 2025» ekspoziţiyanın kurucuları teklif ederlär yaşayannara açsınnar deyni kendilerinä incäzanaat farklı bakışlarını.Sergi açık olacek dekabrinin 15 kadar.
Moldovanın hem Gagauziyanın en mekalı haberleri GRTnın Telegram kanalında!