Komratta geçti tombarlak sofra, angısında bakıldılar soruşlar insannarın bilgileri haklar uurunda hem nesoy genişletmää işi, ki insannar taa üürenikli bu uurda olsunnar. Oluşta pay aldılar maasuz izmetlerin temsilcileri, mass-mediyalar, paraüristlär, ȇkspertlär hem studentlär. Buluşmanın baş neeti, ki hak yardımı olsun taa yakın insannara deyni, annaşılı hem effektiv herbir Avtonomiyanın yaşayanına.
Büün çoyu insannar bilmeerlär, nereyi danışmaa, erlem onnarın hakları bakılmȇȇrlar- ya iş uurunda, soţial soruşları, söleerlär uzmannar. Onun için ȇkspertlär söleerlär, ani lääzım taa aktiv işlemää insannarlan, giriştirmää eni formatları, ki haberlemää onnarı. Teritorial iş inspekţiyanın başı İvan Komur urguladı , ani taa çok insannar danışȇrlar, ani yok annaşmalar iş için, yada geç vererlär kazanç parasını, yada yok lääzımnı iş koşulları. O urguladı, ani insannarın haberlenmesi — ilk adım onnarın haklarını korumaa deyni.
«Er biz söleeriz hak uurunda haberlär için, isteerim nışannamaa, ani insannar sık danışȇrlar, aazdan hem yazılı formada. Bundan kaarä soruşlar hak üürenmesi için kaldırılȇrlar diil sade açan bizä danışȇrlar, ama açan biz kontrol ederiz kurumnarı. Bu uurda var nicä söleyim, ne lääzım eniletmää hem ilerletmää bu soruşta»,- İvan Komur urguladı.
Ȇkspertlär söleerlär, ani insannar diil hepsini, ne okuyȇrlar yada üürenerlär hak uurunda, annȇȇrlar. Halk advokat ofisin başı Komratta Svetlana Mironova nışannadı, ani çoyu problemneri var nicä çözmää, erlim insan vakıdında kabledecek üridik yardımını, yada haberli olacek kendi hakları için, hem bilecek nicä onnarı korumaa.
«Büünkü gün devlet verer kolaylıkları , ki herbir insan tanışsın normativ aktlarınnan Leces.md platformasında internetta. Başka soruş- insannar annamȇȇrlar hepsini, ne okuyȇrlar, neçinki hakların normalarını lääzım açıklamaa, ki insannar annasınnar. Erlem insan bişey bilmärsä dä, lääzım tutmaa aklında, bişey imzalarkan, üürenin, danışın üristlerä, da sora koyun imzanızı»,- Svetlana Mironova nışannadı.
Hak uurunda haberlemäk instrumentlerin birisi- bu üridik klinikası KDU, nışannadı onun başı Natalya Baurçulu. Üridik klinikası başardı proekti, angısına görä geçirdilär buluşmaları insannarlan.
«Biz geçirdik konuşmaları insannarlan, bu pek effektiv metod, biz gidärdik yaşamak erlerinä, da insannar gelärdilär primariyaya, da biz annadardık onnara hak uurunda problemalar için. Biz ayırdık problemayı soylarından kalmaa vaarlı kendi adına geçirmää deyni. Da karşı geldik onunnan, ani bu en aktual problema, angısınnnan karşı geler herbir insan. Soruş çok var çünkü kanonnar sık diişerlär»,- Natalya Baurçulu nışannadı.
Diskusiyalarda pay aldılar studentlär-üristlär, paraüristlär. Onnar annattılar, kendi işi için küülerdä, neredä insannar taa az bilerlär hak uurunda haberleri.
Nikolay Bessarab paraürist: «Var çok programa, angılarına görä haberlener insannar, ki soţial uurunda zor durumda bulunan kişilär bütündän kabletsinnär üridik yardımını. Da biz, paraüristlär, onnara yardım ederiz».
«Bän nicä ilk kursun studenti, isteerim sölemää , ani herbir insan lääzım bilsin kendi haklarını , nicä kendini korumaa, zerä var nicä olsun türlü durum».
«İnsannar lääzım korusunnar kendilerini, insan bilärkänä kendi haklarını, türlü durumda var nicä kendilerini korusunnar».
Tombarlak sofrasının sonunda pay alannarurguladılar, ani lääzım genişletmää baalantıları bu uurda devlet kurumnarınnan, üürenmäk hem cümnä kurumnarınnan hem mass- mediyalarlan.
Moldovanın hem Gagauziyanın en mekalı haberleri GRTnın Telegram kanalında!