GHT avgustun 6-da maasuz topluşu geçirdi. sesiyada sade bir soruş bakıldı – avtonomiyada cümnä-politika durumu, angısı Gagauziya başkanın arestinnän baalı. Deputatlardan kaarä, oturuşta pay aldılar Gagauziyanın primarları,c.mnä temsilcileri.
GHT deputatı, soţialistlär frakţiyasının başı İvan Dimitroglo deputatları teklif etti birleşmää.
«Bän sayȇrım, ani büünkü durumda lääzım birleşelim. Avtonomiyanın öndercilii, politika liderleri, Parlamentin deputatları var olan partnörlara düşer danışsınnar. Vakıtsız seçimneri yok nicä geçirelim, başkanımızı aresttän kolvermeyincä. Bakannık komiteti kendi işini yapȇr»,- dedi Dimitroglo.
Başkanın ilk yardımcısı İlya Uzun hep birlää teklif etti.
«Biz lääzım halklararası strukturalarına danışalım, diplomatiya korpusuna, er onnar demokratiya için sä, gelip annatsınnar, nicä bölä hala geldik»,- nışannadı Uzun.
Oturuşta primar korpusundan kimsey bakışını açıklamadı, söledi cümnä temsilcisi Boris Novak. O belli etti, ani Başkanın aresti bütün cümneyi dalagalandırdı.
«Dışarda insannar avtonomiyanın dolaylarından toplandılar. Onnarın çoyu veterannar, gençlär. Ama deputatlar oturuşu geçirerlär – bu gösterer, ani dünkü olay var nicä herbirnä ilişsin»,- kendi bakışını açıkladı Novak.
Başkanın Guţul Evgeniyanın arest zamanına Bakannık komitetin işini başkanın ilk yardımcısı İlya Uzun götürer.
«Başkanın bir vakıda işini ilk yardımcısı lääzım götürsün. Bu Gagauziyanın kanonunda hem Ulojeniyasında yazdırılırezolüţiyanın istediklerin birisi olacek, ki Bakannık komiteti kendi işini ilerletsin»,- belli etti viţe-spiker Georgiy Leyçu.
«Ulojeniyaya hem kanonun 75 – statyasına görä, bän başkanın işini lääzım götürim»,- dedi Uzun.
Viţe-spiker Georgiy Leyçu bildirdi, ani oturuşta rezolüţiya kabledildi.
«Rezolüţiya büünkü oturuşa hazırdı hem buluşmanın önündä verildi. Şindi dava kalktı – dokumenttä göstermää, ani deputatlar da, cümnä dä kayıl diil başkana cezayı vermäklän. Redakţiya komisiyası rezolüţiyaylan işleyecek, işi kapalı geçecek»,- söledi Leyçu.
Getirderiz aklılarınıza, ani avgustun 5-dä Buyukanı davası Guţul Evgeniyayı kabaatlı buldu politika partiyaların finanslamasında da 7 yıl kapan ona verdi.
Moldovanın hem Gagauziyanın en mekalı haberleri GRTnın Telegram kanalında!