Komratta istorik Stepan Bulgar eni kiyadın prezentaţıyasını geçirdi. Onda avtor gagauz halkın 100 anılmış kultura, bilim adamnarı için yazdı, angıları 19-20 asirlerdä yaşardılar.
30 yılın süresindä istorik Stepan Bulgar topladı metrialları insannar için, angıları derin iz gagauz halkın istoriyasında, kulturasında, bilim uurunda braktılar. Kiyadın prezentaţiyasında Bilim-Aaraştırmak merkezin uzmannarı, üüredicilär, tarihçilär pay aldılar. Nicä urguladı avtor Stepan Bulgar, bu kiyada girdilär insannar, angıları kendilerini çok üüsek uurda gösterdilär.
«Bän 100 kişi seçtim , ki 200 yılık istoriyamızı, bizim halkın potenţialını, gözelliini, zenginniini göstermää. Bu bizim halkın istoriyası, hapsi küülerdän, hepsi kasabalardan te o 200 yılın içindä bizim istoriyamız. Bän seçtim onnarı, angıları kurdular bizim obrazımızı, gözellimizi. Te onnar, angıları yaşadılar 1820 yıllarda, onnarın fikirleri başka türlü, kim 50-ci, onnarın da başka türlü, biz yaşȇȇrız 2025 yılda, herbir pokolenie oldu bütün obraz bu kiyatta»,- urguladı avtor Stepan Bulgar.
Stepan Bulgar urguladı, ani 300 ekzȇmplär tiparlandı, ama neetlerdä var taa iki kiyat yazmaa, nereyi başka anılmış insannar da girecek.
Stepan Bulgar gagauz hem rus dillerindä istoriya, kultura için 200 bilim statyasını tiparladı. 40 monigrafiyanın avtoru oldu.
Moldovanın hem Gagauziyanın en mekalı haberleri GRTnın Telegram kanalında!