Halklararası şahmata turniri, Komrat kasabanın kurulmasına adanarak, 124 genç hem da büük şahmatacı topladı. Yarışmalara Moldovanın her tarafından, hem da Ukrainadan hem Romaniyadan şahmatacılar katıldılar. İlerleder temayı süjet.
Şahmata turniri Komrat kasabasının gününä artık adet gibi oldu. Bu yıl yarışmada 120 sportçu katıldı. Olayın baş neeti — uşaklara vermää kolaylık çıkmadaan devlettän kabletmää becermekleri hem ilerletmää şahmata sport oyununu Gagauziyada, urguladı regional şaşki hem şahmata okulun başı İvan Velikoglo.
İVAN VELİKOGLО Regional şahmata-şaşki okulun başı
«Şahmata oyunu logikayı, düşünmeyi geliştirer. Bundan başka, disţiplinayı geliştirer hem da insanın karakterini terbi eder. Bugün şahmata taftaları karşısında türlü yaş kategoriyalarından, türlü kasabalardan, dolaylardan, okullardan hem da başka devletlerdän gelän şahmatçılar buluşaceklar».
Komrat muniţipiyasının primarı Sergey Anastasov şahmatistleri kutladı hem da onnara kaavi yarışmak hem da büük başarılar diledi.
SERGEY ANASTASOV Komrat muniţipiya primarı
«Çempionatlar uşaklara deyni,ki onnarın olsun motivaţiyaları ileri dooru da zanatlanmaa. Çempionatlar olmarsa, uşakların olmayacek istemeleri sportlan çalışmaa. Ama te onnarda kim taradȇr, hep ölä onnarın var kolaylıkları ileri dooru kaavileştirmää kendi bilgilerini bu uurda. Bu güreşmäk. Burada yok yardımcı. Lääzım sadece kendinä umutlanmaa ».
Yarışlar iki kategoriyaya bölündü. «A» grupunda en küçük şahmatacılar yaraşêrlar hem onnarın turniri bir gün sürter. «B» grupunda taa kaavi hem büük yaşta sportçular oynêêrlar. Bu grupta yarış beş gün devam edecek. Trenerlerin laflarına görä payalannarın çoyu bu yarışa ilk kerä katılmêêrlar, kendi konkurentlarını bilerlär. Onnar urgulȇȇrlar ani partiyalar kaavi geçer, herkez savaşȇr puanları toplamaa hem da en güçlü üçlää girmää çalışêr. En küçük şahmatistlerä bu — gerçek emoţiyalar hem da sporta ilk büük adımdır.
«Bizdä Moldovanın türlü dolaylarından şahmatistlär geldilär. Ukrainadan hem Romaniyadan da sportçular geldilär. Turnir dä üüsek uurda geçer. Konkurenţiya da çok güçlü. Türlü yaşlarda gençlär yarışêrlar, baş titullar için, çempion olmaa hem da bu yarışmada ensemää çalışêrlar».
Şahmata taftalarının karşısında — üüsek konţentraţiya, partiyadan sora — emoţiyalar, angılarını zor saklamaa. İlk taramalar için, zor hodlar hem istemäk için almaa çempion titulunu şahmatacılar kendileri annadêrlar.
«Konkurenţiya hakizdän güçlü. Bizdä halklararası ustalar hem da sport ustası kandidatları var. Onnarlan oynamak çok zor. Ama güçlü konkurentlan oynarkan, bu sana şahmata becermeklerini geliştirmää yardım eder, şahmata hem da poziţiyaya başka türlü bakmaa yardım eder. Bän bu turnirä katılêrım. Bugün çok güçlü bir konkurentlan oynêêrım. Ondan sora turum başlayacȇk».
Yariş sade reyting için geçirilmeer. Tarayıcıları hem da prizorları medallär, diplomalar, kuboklar hem da para baaşışları bekleer. Ama herbir şahmatacı için en büük ödül — kazanılan paasız becermeklär.