Komradın regional sport şahmatı-şaşki okulu Halklararsı şahmatı gününä adalı turniri açık gök altında geçirdi. Oluşta pay aldı Gagauziyanın şahmatı okulların terbiedenneri hem var olan sport oyununu sevenneri türlü yaş boylarında.
«Şahmatı – akıllı oyun. Grosmeysterlär onu bilimcilik, incäzanaat, kultura oyunu deerlär. Bu oyuna türlü boylardan insannar var nicä oynasınnar»,- nışannadı şahmatı-şaşki Regional sport okulun başın bir vakıda işini götürän İvan Velikoglo.
Turnir sıcak, dostlu durumda geçti. Pay alannar bütün becermeklerini koydular, ki tarayıcı olmaa. Ekaterin Kiräkova şahmatılarlar 10 zanaatlanȇr.
«Region uurunda şahmatılarda başarılarım var, Moldova çempionu şaşkilerdä oldum. Şahmatılar – o sport, angısı logikayı ilerleder, fikiri çalıştırȇr, yaşamkta yardım eder. Taramaa belli ki isteerim, ama yarışa katılmak ta bana taa bir kolaylıı kendi bilgilerimi denemää verer».
Şahmatı turnirindä okul üürenicilerindän, profesionnalrdan kaarä, oyunu sevennär dä pay aldılar. Komradın yaşayanı Ruslan Karaivan şahmatılarlan küçüklüktän ulaşȇr. Turnirlerä kolaylıına göra katılȇr.
«Şahmatıları unikallıı için sevdim. Oyun düşündürer, saygıyı karşı tarafa terbieder. Şahmatıları sevenneri, profesionalları, kim sade çekeder oynamaa yortuylan kutlȇȇrım, tarayışları oyunda da, yaşamanızda kazanasınız dileerim»,- nışannadı Ruslan Karaivan.
Gagauziyanın öndercilii avtonomiyanın şahmatı okulunu her taraftan tutturȇr: sekţiyalar, derneklär işleerlär, turnirlär geçirilerlär, metodika, lääzımnı tedarlıklar verilerlär, söleer başkan işlerini götürän bakanı İvan Kolioglo: «Gagauziyada şahmatılar eni soluu aldılar. Bizim şahmatistlerin var okulu, trenerlär, önderci. Sport oyununa taa çok uşak başladı çekilmää».
Şahmatı turnirindä Komrattan, Valkaneşttän, Haydar, Kirsovo, Bucak, Başkaliya küülerindän pay aldılar. Yarışmaklar birkaç boy kategoriyasında pay alannarı kapladılar. Trener Andrey Çeşmeci sayȇr, ani bu sport soyu lääzım herbir yaşamak erindä erindä hem herbir ayledä geliştirilsin.
«Analar gelerlär yarışmaklara. Onnar uşakların büümesini görerlär. Lääzım erleri bulmaa da uşaklar oynasınnar, fikirlerini çalıştırsınnar»,- Andrey Çeşmeci sayȇr.
Şahmatı gününä adalı şahmatı festivali yakın 50 pay alanı topladı. O 3 ȇtapta geçti. Çıkışları şahmatı okulun başın işini bir vakıda götürän İvan Velikoglo açıkladı: «1-ci eri 10 yaşınadan bölüündä Hudoba Alöna aldı, çocukların arasında – Tafratov Vadim. 12 yaşınadan kategoriyasında kızların aralarında 1-ci oldu Kiräkova Eva, çocukların arasında – Komur Dmitriy. Büük grupada kızların arasında ilk oldu – Kiräkova Ekaterina, çocukların arasında – Novak Vadim».
Oluş evlad boylarını, üüredicileri hem çekedän şahmatistleri birleştirer.
Moldovanın hem Gagauziyanın en mekalı haberleri GRTnın Telegram kanalında!