Bitki aftalarlarda Moldovada üüsek sıcaklıklar. Angı bölgelerdä sıcaklık etişer 40-dan. Doktorlar nışannȇȇrlar, ani bitki günnerdä insannar taa sık danışȇrlar bolniţalara.
Anormal sıcaklık çekinmer, insannarın sa durumu sıcaklık için kötüleşer. Bitki aftaların içindä büüdü güneş çarpmaların sayısı. Üüsek temperatular raatsız eder diil sadece insannarı hronik hastalıklarlan ama onnarı da, kim bu zamanda dışarda bulunȇr.
«Kalbi hızlı düülmää başlȇȇr, sora insan çekeder taa sık solumaa. Taa sora zoruna soluyȇrlar, kimi insannarda kalpi bölgesindä aarlık peydalanȇȇr, yufkalık, uyuşukluk, bayılmak duyulȇr. «İnsanda peydalanȇr kaavi kafa acıları, bulantı hem kusma çeker. Yakışȇr temperatura kalsksın, o kalkȇr kendibaşına solumak hastalık olmadan»,- doktor, Komrat bolniţasının urgent bölümün başı Vera Gеrçu söledi.
Uzmannar nasaatlȇrlar taa dikat olmaa insannara hronik hem kalp hastalıklarınnan. Bulunmaa en sıcak saatlarda odalarda, taa çok su içmää. Bunu yapmasaydık güneş çarpmasının riskı büüler. Açık bir örnek Kongaz küüyünün yaşayannı Fedora Vılçu. Düştü bolniţaya, güneş çarpmasının simptomlarını duydu.
«Baktılar da yollardılar Komrada, bendä küçük tension hem kalp düülmesi üüsekti, yaptılar kardiogramma, kalpim pek hızlı düülärdi»,- Kongaz küüyünün yaşayannı Fedora Vılçu nışannadı .
Bu sıcakta doktorun masasında dayma baş koruntusu hem su bulunȇr. Bun işlär güneş çarpmasından koruyabilecek.
«Bu havalarda nekadar taa siirek çıkmaa dışarı, er çıkarsaydık giymää naşeysa kafaya, giymää ilin, bol, açık rubaları, diil sintetika ama natural materiallardan olsun. Su almadan evdän çıkmayın»,- söleer doktor.
Bu afta temperaturalar etişer 40dan.Insannar nışannȇrlar, ani savaşȇrlar koorunmaa bu sıcaklıktan.
«Ölä da pek korunmȇȇrım, ama savaşȇrım giymää rubaları ilin materiallardan çıkarsam dışarı. Evdä kondiţioner var hem çok su için unutmȇȇrım.Evdäysam yada dışardaysam saavaşȇrım çok serin su içmää».
«Çok su içerim hem yıkanȇrım birkaç sıra gündä. Bu kurtarȇr».
«Kafamı güneştän koruyȇrım, açık yaz rubaları giyerim- fıstaları, fistannarı da, artık bilmerım, naşey giymää, pek sıcak. Bilmerim, ne olacek ötää dooru, ama pek zor. Susuz bireri gitmerim, herzaman su içerim. Hep çeker su içmää, pek zor».
«Savaşȇrız taa çok su içmää, gölgedä bulunmaa hem taa az açık güneşin altında bulunȇrız».
«Evdä, içända oturȇrız. Sabaalän erken hepsi kapuları açȇrız. Kоorunȇrız, hepsi ii, bu en büük belamız olsun. Kimär-kerä açan pek sıcak, koyȇrım yaş basmacık ensemä. Büün koymadım, ama bunu da hepsi yapamayacek, kimin var hastalıkları — yakışmȇȇr».
«Kondiţioner altında durȇrız. Pek sıcak, sokakta bulunamȇrız. Taa çok su içeriz, başka bilmeriz, nesoy korunmaa».
«Sıcaksaydı, su serin içeriz, da gideriz işlerimizi yapmaa».
«Kondiţioner altında durȇrız. Başka türlü bilmerim nesoy. Su da içeriz, ama diil okadar çok. Taa az güneştä bulunȇrız».
«Savaşȇrız çıkmamaa, ama açan lääzım çıkmaa şişä suylan alȇrız, gölgedä durȇrız, hızlıca hepsini yapȇrız da içanna gireriz».
«Ölä da koorunȇrız, şindi hızlıca evä kaçȇrız. Evdä, içända oturȇrız. Yok ne yapmaa».
Komrat kasabasında koydular çadırları neredä insannar yakışȇr biraz dinnensinnär, içsinnärsu su hem danışsınnar yardım için. Uzmannar sölerlär, er gün çarpmasının simptomplarını duyarsınız, danışınız 112 kurumuna.
Nışannȇrız, ani gelän günnerdä hava durumu düzülmeyecek — termometralar gösterecek 39-40 gradus sıcak. Aftanın bitkisindä temperatura biraz düşecek hem olacek 33-35 gradus. Avşam hem gecä saatlarında hava sıcaklıı +22…+24 °C aralarında olacek.