«HEDERLEZ-2025» sergisi mayın 13-dä açıldı Regional resim galereyasında. 43 yaratmayı «GAGAUZ ART» resimcilär birliin pay alannarı temsil ederlär. Temayı Svetlana Dimitroglo ilerleder.
9 resimci «GAGAUZ ART» birliindän 43 yaratma «Hederlez-2025» ilkyaz sergisindä teklif ederlär, nerdä patretlär, natura modern, animalizm, diridän yazmalı hem grafikada yapılı. Serginin adı simvollu, çünkü Hederlez – ilkyaz yortusu, angısı naturanın hem insanın canın uyanmasını gösterer, söleerlär ȇkspoziţiyanın pay alannarı.
«İlkyaz sergisinä herkerä eni yaratmaları yazȇrız. Burada üç resimim: ilkyaz-sevgi, karı süreti, bu da fantaziya».
«Hederlez-o Ayoz Georginin, hayvannarın koruyucu günü. Bana deyni hepsi hayvannarın arasında ön erdä beygir durȇr. Bän büüdüm onnarlan, işledim onnarlan. Onnar beni duygulandırȇrlar».
«Malimin hem dädumun bu patredi ellerimä geçti, açan onnar geçindilär. Resim “Anmakların biyaz lekeleri”. Burada taa çok faktura gözlediler. Biyaz-kara renklerdä dä, çünkü – bu geçmişimiz».
«Gagauz Art» resimcilär birliin işleri ȇkspoziţiyada gagauz kulturasının hem tradiţiyaların zenginniini göstererlär, söleer Kultura bakanı Marina Semönova: «Büün biz sizinnän gagauz halkın kulturasını yazȇrız. Yaratmalar pek gözäl. Yaradıcılık birliin resimcilerini ȇkspoziţiya için şükür ederim».
Sergi ilkyazın sonucu gibi oldu, angısı onun renklerini, çizgilerini hem süretlerini korudu, söleerlär serginin pay alannarı hem musaafirleri.
«Hepsi temsil edili yaratmalar şafklı. Var umudum, ani herkezini nesoysa resim duygulandırdı».
«Çoyu resimnär canıma yakın, ama çoyunu da annayamȇȇrım. Lääzım durgunmaa da savaşmaa okumaa onnarı. Sergilerä herkerä, nicä yortuya gelerim».
Ȇkspoziţiyada temsil edili yaratmalar türlü tehnikalarda. Resim hederlez ayın 30-dan açık olacek.
Самые интересные новости Гагаузии и Молдовы в телеграм-канале GRT!