Hederlez halk yortusu topladı Çadır kasabasında insannarı devletin herbir dolayından hem aşırıdan. Olayta pay aldılar Gagauziyanın yaşayannarı, Parlamentin deputatları, Türkiye devletin Genel Konsulu Komratta. Hepsi musaafirlerä hazırlıydı yortulu programma hem geçti konkurs en datlı bulgura- gagauz halkın adetçä imeesi. Gösterili gagauzların adet oyunnarı.
Avtonomiyanın yaşayannarın hem musaafirlerin Hederlez yortusunda vardı kolaylıkları datmaa milli imekleri, tanışmaa halk ustalarınnan, satın almaa baaşışları, ikonaları, rubaları, keptarları, blezikleri hem başka meraklı işleri. Nicä nışannadılar ustacılar, onnar her yıl savaşȇrlar gelmää Hederlez yortusuna da getirmää eni işleri.
«Biz yakın 25 yıl çalışȇrız bu uurda, da insan gelip, beendiini alȇr. Biz savaşȇrız bu işi ilerletmää, neçinki var insannar, angıları severlär bölä rubaları, onun için isteeriz onnarı sevindirmää».
«Zanaatlanȇrız bununnan üç yıl. Artık üç yıl işleeriz. Bu benim hobbim».
«Biz büük havezlän pay alȇrız , ki göstermää bizim işimizi, ustalarımızı. Ne görersiniz, bendä bu el işi».
Yortunun misaafirleri nışannadılar, ani gagauzlar koruyȇrlar dedelerin adetlerini, da bunu göstererlär.
«Biz arkadaşlarlan Türkiyedän maasuz bu yortuya geldik, sanȇrım ileri dooru da gelecez».
«Çok gözäl, çok beendik, ilk keret geleriz Tükiyedän burayı, bizim çok hoşumuza geldi».
«İlk keret geldik Gagauziyaya, çok mutluyuz sizi görmää, biz üürediciyiz, hepsini beendik».
«Biz sizin adetlerinizi görmää deyni geldik, gagauz türklerinnän hem tanışalım, hem onnarlan dost edelim».
Hederlez yortusunda geçti adetça konkurs en datlı bulgura. Avtonomiyanın yaşamak erlerin çorbacıykaları hazırladılar kendi reţeptlerinä görä datlı bulgurları, angılarını sora notadılar musaafirlär. Herbir küü karşıladı pay alannarı adet imeklerinnän, oyunnarlan hem türkülärlän. kendi adetlerini gösterdi Orgeev dolayı da.
«Bu en paalı, ne var bizdä, çünkü adetsiz, kulturasız biz yok nicä yaşayalım, bu bizim zenginiimiz, angısı kaldı bizä dedelerdän. Da biz bunu lääzım koruyalım, verelim unukalarımıza»,- Natalya Kupça, «Busuyok» folklor ansamblisi başı, söledi.
Konkursun çıkışlarına görä en ii bulgur musaafirlerin bakışlarına görä Kongaz küüyündän.
«Saa ol, ani ayırdınız bizi, biz datlı yaptık. Da şükür ederim, kim hazırladı hem pay aldı yortuda»,- Mihail Esir, Kongaz küüyü primarı, nışannadı.
Gagauziyanın Halk topluşun başı Dmitriy Konstantinov çizgiledi, ani Hederlez — iki en büük yortuların birisi, angısını bizim insannar üüsek uurda nışannȇȇrlar.
«Biz büün bulunȇrız yortuda , göreriz insannarın hallarını, bizim musaafırlerin, yaşayannarın. Yortu söleer onun için, ani geldi bizä ilkyaz, işlär kırda azalȇr, hayvannar da kıra çıkȇr»,- Dmitriy Konstantinov nışannadı.
Bakannık komitetin başın ilk yardımcısı İlya Uzun nışannadı, ani hederlez- en sıcak hem cannı yortu gagauz halkına deyni.
«Bu diil sade ilkyaz festivali, bu yaşamanın simbolu, dinin simbolu, gagauz halkın ruhu, kaavilii. Eveldän bu yortu birleştirer evlat boylarını, o söleer bizä, kim biz vardık, kim varız, hem kim olacez. Gagauziya — bu bizim dedelerin topraa, angıları severlär işi, koruyȇrlar dilimizi, kulturamızı, adetleri»,- İlya Uzun nışannadı.
Yortuyu ilerletti konţert, neredä pay aldılar gagauz artistleri. Yortunun kulminaţıyası oldu şou, angısını gösterdi Moldovanın atsport klubu hem At- prolin kurumun beygirleri. Bu gün yortulu olaylar geçtilär Çadır kasabanın merkez parkında. Kutladı yaşayannarı Moldovanın Premyer-ministrusu Dorin Reçan: «Bän isteerim kutlamaa gagauzları gözäl ilkyaz yortusunnan. Te ilkyaz geldi , da bu söleer, ani bizdä var umut. Da bizdä var, ne için sevinmää. Bän pek sevinerim, ani Çadır kasabasında hazırladılar bölä yortuyu».
GRT korespondenti istedi taa vermää soruşları devlet kuvetlerinä, okadarki premyer-ministr hem Çadır kasabasının primarı gittilär. Hederlez- gagauzların en büük yortusu, angısı bakılȇr Ay Görgi günündä. Bu günü gagauzlarda çekeder yaz, hem hayvannar çıkȇrlar kıra.
Moldovanın hem Gagauziyanın en mekalı haberleri GRTnın Telegram kanalında!