Komrat muzika okulun üürenicileri çıkış konţertini kasaba Kultura evindä geçirdilär. Olay topladı anaları-bobaları, üüredicileri, dostları, angıları genç muzikantları tutturdular hem gördülär, ne onnar üürendilär.
Komrat muzika okulun üürenicilerin konţertindä klasika, halk hem zamandaş muzikası öttü. Fortepiano, kemençä, vokal hem halk bölümneri üürenicileri , nicä özel nomerleri, ölä ansambl muzikasını gösterdilär. Sţenadan anılmış kompozitorların Bah, Çaykovskiy, Bethoven yaratmaları, zamandaş hem halk avaları öttülär.
«Çıkış konţert- bu kolaylık uşaklar için kendisni, sţena becermeklerini göstermää, zalanın tutturmasını duymaa. Bölä olaylara uşaklar havezlän gelerlär hem katılȇrlar, hazırlanȇrlar, neçinki artist – o diil o, angısı kabinettä oynȇȇr hem sade ekzamenneri verer, artist lääzım sţenada olsun. Da uşaklar bunu duyȇrlar. Onnara sıra gelmeer bu iş için sölemää hem nesä annatmaa. Büün bizdä çıkış konţert da bizim kolektivimiz pek islää bu olaya hazırlandı»,-nışannadı okul başı Dmitriy Timofey.
Çıkış konţert- o bir yılın işi, o verer kolaylık üürenicilerin bilgileri hem becermekleri için çıkışları yapmaa, nışannadı muzika okulu başı yardımcısı Natalya İofçu: «Bu bizim üüredicilerin, bizim uşakların yıl çıkışları. Bu bir kolaylık, ki analar-bobalar kendi uşaklarını konţerttä göräbilsinnär, neçinki bir uşak var nasıl birkaç kolektivdä bulunsun. Bunun için bän düşünerim, ani onnara bu pek önemni».
Siiredicilär genç artistlerin herbir nomerayı sıcak karşılardılar. Okulun en küçük üürenicileri için bu konţert ilk oldu.
Çıkış konţert uşakların hazırlanmasının üüsek uurunu hem üüredicilerin profesionallıı gösterer, söleer kultura bakannıı uzmanı Anna Pometko: «Bölä olaylar gagauz kulturasında pek önemni hem lääzımnı , neçinki sade bölä yıl sonunda muzika okulların konţertlerindä biz göreriz, belli ederiz o üürenicileri, angılarında talant var,becermek üüsek uurda diil sade kendi yaradıcılıını, kultura uurunda bizim avtonomiyamızı göstermää, uşaklar kendi talantlarını yabancı topraklarında, respublikada göstererlär».
Muzika okulun terbiedenneri söleerlär, ani havezlän muzikaylan zanaatlanȇrlar.
«Bän okulda iki yıl üürenerim, akordeonda çalȇrım. Burada pek şen hem var nasıl türlü meraklı işleri üürenmää».
«Bän üç yıl muzika okuluna gezerim, akordeonda çalȇrım, burada başka instrumentlerä var nasıl yazılmaa, solfedjioya gezmää, horda çalmaa, muzika literaturasını üürenmää».
«Burada pek çok meraklı iş var. Bän hepsini burada beenerim. Var solfedjio, hor, zanaat».
Andrey Valkov adına muzika okulunda Komrat dolayın türlü yaşamak erlerindän yakın 350 uşak üürener .
Moldovanın hem Gagauziyanın en mekalı haberleri GRTnın Telegram kanalında!