Komrat kasabası M.Kemal Atatürk bibliotekasında Vasi hem Pelageya Filuoglular aylesininnän buluşmak geçti. Olaya katıldılar gagauz yazıcıları, Filioglu aylesinin dostları hem senseleleri.
İki cana- bir ömür. Vasi hem Pelageya Filioglu aylesi 56 yıldan zeedä bir yoldan giderlär koruyarak saygıyı biri-birinä, sevgiyi ayleyä, hem zanaatlanan işä. Küçüktän taa eri, topraa, küüydä yaşamayı sevän insannar. Bu sevgiyi onnar kendi yaratmalarında da yaşadȇrlar, nışannadı M.K.Atatürk adına türk bibliotekasının başı Vasilisa Tanasoglo: «Vasiliy Georgieviç bizdä çoktan anılmış bir yazıcımız. Bilerim, ani diil sade gagauz erimdä, Moldovada, ama başka devletlerdä dä onu tanıyȇrlar. Katılȇr simpoziumnara da, yaratmaları çevirildilär rus dilinä, beki başka dildä dä var. Onnarın yaratmalarını bizim uşaklarımız şkolada üürenerlär. Halizdän büünkü gündä var kiminnän kendimizi gurur duyalım, ani bizim bölä yazıcılarımız var, ani bizim literaturamızı kaldırȇrlar, ilerlederlär. Alla versin saalık, ömür sizä, aylenizä. Allaa herzaman sizä yakın olsun , siz dä ona».
İkisi dä Beşalma küüyündä duumaları. Ayledä gördüü sevgiyi, saygıyı, çalışkannıı kendi uşaklarına da vermää savaştılar, nışannadı Vasi Filiolglu: «Biz küçüktän taa anadan nelär gördük, nelär işittik bobadan savaştık hiç yannış yolu alamamaa, zerä o yoldan bizi götürärdilär, osoy bizi üüredärdilär. Biz nesoy gördük, ölä dä kendi uşaklarımızı dünneyä getirdik hem savaştık hep ölecä onnarı terbietmää».
«Terbiedärdilär insannık olsun, dooruluk, ani ne dä yapmasan çaarık suratına giidirmemää. Uz yoldan gitmää hem dä üşenmemää iş yapmaa. Hiç iştän kimsä ölmemiş , siz dä ölemeyeceeniz. Lääzım işlemää, kazanmaa da yaşamanı doorulukçasına düzmää, diil yalannan»,- Pelageya Filioglu peetçi, yazıcı nışannadı.
Pelageya Mihaylovna 36 yl üüredicilik yolundan gideräk uşakları gagauz dilini, literaturasını, kulturasını, adetlerini sevmää üüretti. Vasiliy Georgieviçin işi ekmek büütmesininnän baalıydı. Bakmayarak hızlı hem sıkı yaşamaya, onnar herzaman aktiv pay alardılar hem büün dä katılȇrlar küüydä geçirilän türlü olaylara, nışannadı Beşalma küüyü D.Kara Çoban adına istoriya hem etnografiya Milli Gagauz muzeyin başı Lüdmila Marin: «Onnar okadar aktiv yaradan, aktiv yaşayan, aktiv katılan herbir yortuya. Okadaradak meraklı bir aylä, angısına herzaman mayıl olardık, ani onnar bilä. Herzaman biri-birinä arka olardılar, yardımcı olardılar. Büünnän-büün dä hep yannaşık, büünnän büün hep gülümseyeräk».
Vasi hem Pelageya Filioglular büün dä aktiv yaşamak yolunu ilerlederlär. Birliktä işleerlär, birliktä oluşlara katılȇrlar, birliktä torunnarı terbiederlär. Onnarı berleştirer diil sade bir yaşamak yolu, ama sevgi literaturaya da. Onnar ikisinä verilän bir yaşamak kiyadını yazȇrlar. İki cana-bir kiyat, angısı dolu sevgiylän Ana dilinä, Topraana, ayleyä.
Avtor: A. Terzi, operator: S. Georgiev, montaj: A. Topal
Moldovanın hem Gagauziyanın en mekalı haberleri GRTnın Telegram kanalında!