Küçük ayın 21- dä, Ana dili haklklararası yortusunda, Gagauziya M.V. Maruneviç adına Bilim Araştırmak merkezindä geçti «İlişka Dädu» pyesanın prezentaţiyası gagauz dilindä, angısının avtoru Gagauziya patriotu, bard Födor Kiroviç.
«İlişka Dädu» pyesanın redaktoru — Aleksandra Kristova. O nışannadı, ani tanışıp Födor Kiroviçin işinnän, may bişey diil lääzımdı diiştirmää, hem belli etti, ne için pyesanın prezentaţiyası geçti Bilim Araştırmak merkezindä.
«Neçinki Födor Kiroviç diil sade saygılı aksakal , ama sayılȇr gagauz avtonomiyasının patriotu, hem yakın dosttu Mariya Maruneviçlän, bu merkezin kurucusunnan. O üzerä biz kararladık bu becerikli yaradıcı insanı tutturmaa bu literatura uurunda işindä. Da bunun için onun yaratmasının prezentaţiyası geçti bilim merkezindä»,- Aleksandra Kristova açıklȇȇr.
«İlişka Dädu» pyesası gagauz dilindä yazılı dramaturgiya janrasında. Kendi toplumunda avtor açıklȇȇr soţial temalarını.
«Açan bän yazdım bu pyesayı, dooru söleyecäm, ani yoktu bendä havez, ki o tiparlansın. Bezbelli Allahtan, bän işittim ses, ani bän lääzım pay olıım onunnan Aleksandra Afanasyevnaylan. Da açan o okudu pyesayı, metetti benim işimi da söledi — sade ileri. Onun laflarından sora, bendä kuvet hem havez peydalandı, iş ileri gitti. Da o çeketti redakţiya ona yapmaa»,- avtor açıklȇȇr.
Pyesanın prezentaţiyasında bulunannar nışannadılar toplumun paalılıı hem önemliini. Gagauz yazıcılar Birlii öndercisi Konstantin Kurdoglo çizgiledi, ani pyesanın avtoru Födor Kiroviç açıldı başka taraftan. Yazmaa deyni pyesaları başka janralarda pek zor, nışannadı yazıcı.
«Yok kolay janralar, pyesada sa maasuz lääzım olsun literatura uurunda hazırlanmaklar, kim alınȇr bu işä deyni. Lääzım pek çok düşünmää, nicä burada süjetları, ȇpizodları, düşünmeyi düzmää, da bitkiyadan gitmää. Hepsinä bu diil verili yapmaa».
«Zamandaşta bizdä kiyatlar pek kuru, nesoy sa birtürlü, angıları vermeerlär kolaylık halezdän göstermää ȇpohanın canını, o olayları, angılarını insan şindän sora geçirdi. Bu pyesayı var nasıl kullanmaa diil sade gagauz dili hem literatura dersindä, ama gimnaziyada başlankı klaslarda, da nicä moral hem duh terbietmesindä».
Bu ilk, ama diil bitki Gagauziya patriotun hem bardın Födor Kiroviçin toplumu.
Moldovanın hem Gagauziyanın en mekalı haberleri GRTnın Telegram kanalında!