Gagauziya M.Maruneviç adına BAM geçti lekţiya, angısının süresindä Dm.Mavrodi liţeyin büük klasları üürenicilerinä annattılar Gagauziya şannı yaşayanı, politikacısı — Karakaş İlya için.
Karakaş İlya İvanoviçin adı gagauz halkının istoriyasında diveç kalacek. Onun yaşamak yolu örnek herbir insana deyni, ama en önemni, ani onun yaptıklarını büünkü gençlär lüüzım bilsinnär, nışannadı istoriya bilgileri doktoru Pötr Paşalı: «Gençlär bakȇrım sesleerlär, ani onnar bilmeerlär o adamnarı,onnar körpä taa, ama te o işleri , angıları kaldı o adamnardan lääzım şindiki evladlara geçsinnär da onnar lääzım üürensinnär , okusunnar hem düzsünnär kendi yaşamaklarını te o örneklerdä, angılarını kurdu bizä İlyä İvanoviç Karakaş».
Karakaş İlyä İvanoviçin gagauz Avtonomiyası kurulması proţeslerindä aktiv pay aldı. O inanardı hem herkezinä inandırardı, ani gagauz halkının var hakı kulturasını, adetlerini hem dilini Moldova Devletindä ilerletmää. Onun diplomatiya uurunda bilgileri hem becermekleri Vatandaşlarının hem devlet politikacıların arasında pek saygılıydılar, nışannadı Pötr Paşalı: «O çok teer döktü kurtarmaa gagauzları. O topladı bir erä Ukrainanın politikacılarını, Türkiyenin politikacılarını, Moldovanın politikacılarını. O işledi diplomat Ankarada da. Bizdä yaptı çok işleri, gösterdi angı yolda lääzım gitsin Gagauz Respublikası hem sora bizim Gagauziya. O yardım etti bizä yazmaa bizim temel kanonumuzu -Ulojeniyayı, da biz bunu yok nicä unudalım. Bölä adamnar bizdä pek az».
İlya Karakaş Gagauz Avtonomiyası kanonnarının işletmesininnän zanaatlandı. OBSE, Evropa nasaatı, Belorusiya, Ukraina hem başka devletlerin uzmannarın ekspertizası belli etti bu dokumentlerin unikal içindeliini, neredä gagauzların kendi Avtonomiyası kurulması kanona görä yazdırılı. İlya İvanoviç Karakaş geçindi 2021-ci yılın noyabr ayın 2-dä.
Avtor: A.Terzi, operator: V. Kıssa, monraj: M.Kazaku
Moldovanın hem Gagauziyanın en mekalı haberleriGRTnın Telegram kanalında!