Dekorativ incäzanaat tehnikası – nitkografiya – o resimneri, tertipleri ipliklerdän yapmak. Var olan tehnikayı ustacılık uurunda Valentina Şişku Valkaneşttän çalıştırȇr. Bu uurda yapılı işlär ipliklerdän kıvradılı hem dikmä resimneri akıla getirderlär. İpliklär yapıştırılȇrlar yada sardırılȇrlar üsttän. Bu zanaatlan Valentina 3 yıldan zeedä zanaatlanȇr. Nitkografiya tehnikasına kasabanın uşaklarını Yaradıcılık evindä üüreder.
El işlerinnän Valentina Şişku küçüklüündän ulaşȇr, ama nitkografiya tehnikasını gördüynän, meraklandı okadaradan, ani onun sevgili işi oldu. Usta kendi unukal stilini buldu. İşindä sintetika, yapaadan, natural ipliklerini kullanȇr. Onnarın yardımınnan Valentina Georgievna natura hem real süretlerini kurȇr. Nitkografiya incäzanaatını o Valkaneş Yaradıcılık evindä küçük boyda uşaklara götürer. Resimnerin, dekorativ tertiplerin yapmasında onnar öncä kullanılmış işleri kullanȇrlar, söleer Valentina Şişku.
«İpliklär kullanılmış rubalardan sökülü, onnardan gözäl resimnär olȇrlar. Resimnerin dış çizilerini satın alma ipliklärlän çizgileriz, içindeliindän ayırılsın»,- söleer Valentina Şişku.
Nitkografiya – dekorativ incäzanaatı, neredä herbir iş ellän yapılȇr: usta herbir ipçeezi erleştirer, incä çizilärlän resimä derinnii verer.
«Yapraa yada kartona ilkin resimi geçireriz, sora onun kenarlarını kalınnıınnan hem renginnän belli ederiz, da sade sora resimin içini doldurȇrız»,- nışannȇȇr Valentina Şişku .
Valentina Georgievnanın herbir işi — istoriya. Birindä çiçek gösterili, o da sansın te-te sallanacek. Öbüründä – masal personajları dirilerlär. Kimi resimnerdä natura, duuma eri nitkografiya tehnikasında süjet olȇrlar, belli eder Valentina Georgievna.
«Güz teması bu resimdä. Yapraan kenarını ilktän yaptım, şindi dä ortasını doldurdȇrım. Sopacıklan işleerim. Doldurdȇrım ikinci kerettän, bir katlan okadar kaba olmȇȇr»,- ekledi o.
Sıbıdılan predmetleri biz donaklȇȇrız: onnar var nicä koropkalar olsunnar, şişä bankaları, plastik şişeleri, her gün kullanılan predmetlär.
«Resimnerdän kaarä, sıbıdılan materiallara ikinci yaşamayı vereriz. Deyecez bu bankacık kullanılmış şişedän. Sardım onu kenever ipliinnän da çiçek küpü oldu. Bu-plastik şişesindän, bacacıkta çiçek küpü»,- çizgiledi Valentina Georgievna .
Valentina Georgievna resimneri sade yapmȇȇr, o master-klasları geçirer, uşakları üüreder, nitkografiya incäzanaatın saklılıklarınnan paylaşȇr. Onun baş neeti – başkalarını da üüretmää gözelii sadä işlerdä görmää hem nitkografiyada onnarı açmaa, nicä bir sıra o kendisi bunu yaptı.
Avtor: S. Dimitroglo, operator: S. Georgiev, montaj: M. Kazaku