Komratta regional intelektual kvest-oyun Gagauziya uşak resim okulların aralarında geçti, adalıydı Halklararası resimcilerin gününä. Nesoy çıkşılarlan oyun başarlandı, bizim ilerki süjedımızda.
Kvest-oyunda 6 komanda pay aldı, herkez resim okuldan ikişär komanda. Bütünnä 36 genç resimci güreşärdilär incä zaanat istoriya bilgilerindä hem resimciliktä. Oyunun kurucusu Gagauziya kultura bakanı oldu. Geçti olay «AXIS» gençlik kurumunda.
«Biz göreriz, ki uşaklar sevinerlär butakım oyunda pay almaa. Hiç gücenmeerlär, er ilk erleri alȇrlar, kişi kim incä zaanatlan baalı ilerlesin lääzım. Bulunarak kendi resim okullarında elbetki uşaklar ilerleder kendi becermeklerini. Ama pay almak butakım oyunnarda verer kendi bilgilerini hem becermeklerini»,- Marina Semönova Gagauziya kultura bakanı nışannadı.
Başlanıldı oyun komandaların tanışmasından, neredä komandaların başları tanıştırdılar hepsi temsilcilärlän. Bundan sora kontrol edildi oyuncuların bilgileri incä zaanat istoriyasında hem resimcilik becermeklerindä. Uşaklar gösterdilär kendi bakışlarını hem becermeklerini, nışannadı resimci Mihail Arabadji: «36 üürenici, düşünersiniz mi nekadar bilgi barabar toplanȇr. Nekadar hazırlanmak lääzım olsun. Düşünerim ki bu barabar iş hem üürenicilerin savaşması hem üüredicilerin bilgileri».
Üüredicilär nışannȇȇrlar, ki butakım yarışmaklar yardım ederlär belli etmää uşakların talantlarını.
«Her yıl bizdä eni pay alannar oynȇȇrlar. En önemni bän onnara ne söledim- kabledin eni bilgileri, eni tanışmakları».
«Biz getirdik bir komanda. O geçän yıl hep oynaardı. İkinci komanda ilk sefer gençlär oynȇȇrlar. Bu pek meraklı, herbir uşak kendisinä naşey sä meraklı alȇr».
İlk eri kvest oyunda Y-22 Komrat resim okulundan aldı. Hepsi uşaklar kablettilär anmak baaşışları.
Moldovanın hem Gagauziyanın en mekalı haberleri GRTnın Telegram kanalında!