Gagagauziya M.Maruneviç adına BAM-dä Halk artisti İon Bass için kiyadın prezentaţiyası geçti. Oluş Gagauziya kultura ortamı için önemli bir adım oldu.
Kiyatta toplu geçiş informaţiya İon Basın küçüklüü hem incazanaat yaşaması için. Bundan kaarä burayı girdilär türkücünün kolegalarının aklınagetirmekleri dä. Verilerlär foto hem arhiv dokumentleri dä.
«O pek anılmış adamdı, onun katkısı gagauz hem bolgar halk yaratıcılında önemni eri kaaplȇȇr. Kimi informaţiya arhivlerdän alınmış , kimileri gazetalardan. İon Basın kolegaları kayıl oldular bizimnän buluşup-lafetmää hem onun için annatmaa. gagauziya kultura vaarlıı büün korunȇr İon Basın yaratmalarında»,- nışannadı Viktor Zlatovçen, «Bucaan büülü sesi̇» ki̇yadın avtoru.
Oluşta pay aldılar Gagauziya kultura temsilcileri hem artistin yaratıcılıını sevennär. MD şannı artisti, «Düz Ava» ansamblinin öndercisi Tatyana Şögoleva nışannadı, ani İon Bas bütün kendi yaşamasını incazanaata adadı.
«İvan Borisoviç herzaman söläärdi, ani biz bunu diil kendimizä, amma yaşayannara deyni yapȇrız. Siyredici notalayacek bizim işimi. O pek sevärdi Komratı, pek sevärdi Gagauziyayı, onu herbiri bilärdi»,- Tatyana Şögoleva nışannadı.
Kiyat Gagauziya BAM destäännän tiparlandı, hem önemni kiyat seriyasının bir payı oldu, nışannadı M.Maruneviç adına BAM bilim sekretar işini götürän Vitaliy Boykov: «Bu kiyatta veriler anılmış türkücünün biorrafiyası bilgileri. Elbetki, biz bütün onun yaşamasını bir kiyatta erleştirämeyecez. Ko genç evladlar bilsinnär, tutsunnar aklılarında hem kurusunnar halkımızın kultura vaarlıını».
İon Basın yaratmaları büün dä kaaplȇȇrlar önemni rolü gagauz milli folklorun koorunmasında hem ilerlemesindä.
Avtor: A. Terzi, operator: G. Stavilov, montaj: A. Gerçu
Moldovanın hem Gagauziyanın en mekalı haberleri GRTnın Telegram kanalında!