GRT CK jurnalistleri bitki vakıtlar taa sık karşı gelerlär cümnä olaylarını açıklamak zapetmesi olaylarınnan. Bölä olayların birisi oldu Fevralin 27-dä, açan GRT kanalın çekim grupasını oturuşa kolvermedilär. Bölä olaylar engel ederlär jurnalistlerä baamsız hem serbest kendi izmetini gerçeklemää, nışannadı dezinformaţiyaylan güreşmäk merkezi nasaatın azası Petru Makovey.
«Taa bir sıra isteerim açıklamaa, ani “Cümneyä deyni önemni informaţiyanın açıklıı” kanonuna görä , oturuşlar, angılarında pay alȇrlar millet hem regional kuvet temsilcileri lääzım açık olsunnar hepsi Mediya kurumnarına deyni . Eer, amma jurnalistleri bölä olaylara kolvermärseydilär, bu iş kanona karşı gider. Eer bu kanon bakılmarsa, en ilkin bu olayı bildirmää lääzım, ikinci-bän teklif ederim sizä polis uzmannarına danışmaa. Bän pek sevineceydim, eer bölä danışmaklar olaydılar herzaman, açan kanon bakılmȇȇr»,- nışannadı Petru Makovey.
GHT başı Dmitriy Konstantinov nışannadı, ani demokratik cünmesindä Mediya kurumnarı cümneyä deyni önemni informaţiyayı serbest açıklasınnar lääzım.
GHT üridik soruşları, insannarın hakları hem informaţiya politikası komissiyasının başı Aleksandr Dülger nışannadı, ani jurnalistlerä serbest işlemenin zapetmesi birkaç kanona karşı koyȇr.
GRT kanalın «Общественный интерес» programasının süresindä MD Hükümeti presa sekratarı Daniel Vodȇ nışannadı, ani jurnalistleri önemni cümnä olaylarına kolvermemäk dooru diil.
«O olaylar, açan sizi nereyisä kolvermeerlär, küstürücü gelerlär, bani kendimi pek küstürer, açan jurnalist kendi işini dooru gerçekleyämeer»,- Daniel Vodȇ nışannadı.
Jurnalistlerä karşı baskı yapmak hem onnara önemni olaylarda bulunmak zapetmesi, laf serbestliinä karşı koyȇr hem yaşayannara aslı informaţiyayı vermää zoorlandırȇr. GRT CK jurnalistlerini koorumak- önemni lääzım olsun diil sade jurnalistlerä kendilerinä , amma bütünnä cümneyä deyni dä, nışannadı Stepan Piron: «Jurnalistlerin var hakı kendi haklarını da koorusunnar, nıcä onnar başakalrın haklarını koruyȇrlar. Büün kanon verer bu kolaylıı. Sayȇrım ani eer enikunu hem pek dikkat bu kanonnarı kullanarsaydık jurnalistleri korumakta -başarılı çıkışlara gelelim yakışȇr».
Bitki aftaların süresindä GRT CK jurnalistleri birkaç sıra karşı geldilär olaylarlan, angıları jurnalistika işini gerçeklemää engel edärdi. Örnek: GRT kanalın jurnalistlerini pilis uzmannarı hem Komrat primȇriyası uzmannarı kolvermedilär girsinnär Regional ilerlemesi nasaatın oturuşuna, Bundan kaarä Su-Kanal kurumun öndercilii çaarıp polis uzmannarını karşı koydu jurnalistlerin işinä. Bu olaylarlan baalı GRT CK öndercilii açıklamaylan çıktı.
«GRT kompaniyanın öndercilii maana bulȇr jurnalistlerä karşı yapılan baskı olaylarına hem teklif eder kompetent kuruluşları MD kanonnnarına görä bu baskıları gerçekleyennerdän cuvap istesinnär. Zamandaş cümnedä jurnalistleri azarlamak hem baskılamak olayları bir tarafta diil lääzım kalsınnar. Publik uurlarında izmetlerini götürennerä teklif ederiz bölä olaylarda taa dikkat olsunnar hem baskılamasınnar jurnalistleri. MD Audovizual kodeksin 10-cu statyasına görä jurnalistlerin var hakı korumaa kendilerini baskılardan, angıları engel ederlär onnara serbest kendi işini gerçeklemää. Jurnalistleri baskılamak hem işlerini gerçeklemää zapemäk kanonnan cezalandırılȇr. Alarak bunu esaba- herbir köstek jurnalistlerä kendi işlerini gerçeklemektä, yada herbir zapetmäk kanona karşı gider. Hep ölä biz teklif ederiz Komrat kasabası primȇriyasını hem başka devlet kurumnarın uzmannarını ii davransınnar jurnalistlerä hem annasınnar, ani jurnalistlerin işi pek önemni cümnenin saalıklı ilerlemesi için. Teklif ederiz kompaniyamızın jurnalistlerini raada brakmaa hem vermää onnara kolaylık raat hem serbest kendi profesional işini gerçeklemää»,- haberledi «Gagauziya Radio Televizionu» Cümnä Kompaniyası.
Cümneyä deyni önemni olan informaţiya bildirmesi kanonuna görä Mediya kompaniyaları lääzım açıklasınnar hem yayınlasınnar cümnä maanasında informaţiyayı. Publik kurumnarın oturuşları herzaman herbir insana deyni açık olsunnar lääzım-oturuşların süresindä dä jurnalistlär yakışȇrlar serbest işlesinnär hem informaţiyayı yaşayannara annadıp- göstersinnär. Aklınıza getireriz, ani GRT CK tek yayın kompaniyası, angısını bütün Gagauziyada siyredäbilerlär.
Avtor: A. Terzi, operator: V. Kıssa, montaj: İ. Rezuneţ