Jurnalistlär Şveyţariyadan ikinci yıl sıradan gelerlär Gagauziyaya, çıkarmaa deyni dokumental filmini Tomay küüyü için. En pek onnar esaba alȇrlar insannarın yaşamasını, adetleri, kulturayı hem hergünkü küüyün yaşamasını.Temayı ilerleder Polina Barbova.
Şveyţariyadan jurnalistlär Gagauziya için filmını göstermäk için Tomaydan başladılar. Meraklık regiona peydalandı ondan sora, nicä jurnalistlär tanıştılar gagauz rȇperın STEDIN yaratmasınnan, annattı rejissor, dokumentalist Şveyţariyadan Svetlana Rodi̇na.
SVETLANA RODİNA rejissor, jurnalist Şveyţariyadan
“Bu film çeketti diil Tomaydan, ama çeketti bizim filmın bir kahramanından. Biz bulunduk Moldovada, Kişinöv kasabasında festivalda, neredä gösterdik bizim başka kinoyu. Kimsaydı çeketti annatmaa Gagauziya için. Bän çekettim aramaa google yardımınnan, da buldum repȇrın STEDIN klipını gagauz dilindä, da beni okadar kapladı bu türkü, o pek intensivdı, bän annamazdım lafları, ama annardım, ani nesä meraklı. Biraz taa sora üürendim, ani bu türküdä o çalardı, ani genç olannar diil lääzım gitsinnär çalışmaa sınır aşırı, hem ani bu büük bir problema Gagauziya için”.
Bundan sora, Svetlana annattı kendi kolegasına Ranuya ideyasını, filmın kahramanı için. Biraz taa sora onnar tanıştılar STEDLAN, angısı o vakıt bulunardı kazançta Almaniyada. Ȇdikt Stoykov — Tomay küüyün yaşayanı, muzika uurunda zanaatlanȇr psevdonimnan STED.
SVETLANA RODİNA rejissor, jurnalist Şveyţariyadan
“ Biz dostlaştık rȇperlan Almaniyada, neçinki o orada çalışardı, annattı bizä kendi küüyü için, kendi kafadarı için Kösä Dmitriy için, angısı küüyün primarı. Da biz düşündük — iki genç olan, iki ecel, angıları savaşȇrlar burada yaşamaa. Angıları pek severlär Gagauziyayı, pek severlär Tomay käüyünü, da herbiri savaşȇr bulmaa kendisini bu dünnedä, kendi vatanında. Da bu oldu filmin ideyası. ”.
Bıldır avtorlar şindän sora çıkardılar Gagauziyayı hem da tanıştılar Tomay küüyün yaşayannarınan. Bu yıl onnar genä ilerlederlär işini film uurunda. Onnar isteerlär göstermää, nicä küüyü yaşȇȇr büün, çizgiledi rejissor, jurnalist Şveyţariyadan Svetlana Rodi̇na.
SVETLANA RODİNA rejissor, jurnalist Şveyţariyadan
“Ölä ansızdan oldu, ani bizim iki kahramanımız da Tomay küüyündän. Onun için da biz çıkarȇrız sade orada. Bizim için Tomay küüyü — bölä bir dünnenin bir paycazı, angısı belli eder bütünnä Gagauziyayı”.
Jurnalistlär Şveyţariyadan Tomay küüyün yaşayannarın ecellerindän isteerlär annatmaa zamandaş Gagauziya için — insannar için, adetlär için, kultura için hem da problemalar için. Çekimnär geçerlär küüyün türlü köşelerindä, baş kahramannar sa olȇrlar küüyülülär.