GHT deputatları ikincilä yollandıraceklar MD Parlamentinä iniţiativayı Seçimnär kodeksına diişmeklär için. Taa ileri dokument bakılmadı o üzerä, ani geçän sozıvın Parlamentin vakıdı geçtiydi.
Gagauziya Halk Topluşun oturuşu çeketti günün işin bakılmasından. Ona görä lääzımdı bakılsın 8 soruş. Avtonomiyanın kanon bölümün deputatları tutturdular cümleyi, çıkarmaa deyni günün işindän soruşu, angısı balıydı Ormanjı Nikolayin — Gagauziya Halk Topluşun öndercinin bir vakıda işini götürenin danışmasınnan. İniţiativaylan söz tuttu deputat Nikolay İvançuk. Onu tutturdu 15 deputat, da soruş çıkarıldı günün işindän. İvançuk haberlerdi, ani bu durumda pek önemni esaba almaa seçimnerin hazırlanmasını, ama diil kadr soruşlarını.
«Zamandaş, çekedip GHT başın görevinä seçimnerin hazırlanmasına, biz vereriz kolaylık cümneya hem meraklılara, ani biz savaşȇrız tutunma hükümettän hem da kendi iş erlerimizi. Bunun erinä, nasaat ederim düşünmää, ki kısa zamanda -iyünün 21 — dä — geçirmää seçimneri, da bunda koymaa nokta. Sayȇrım, ani biz var nasıl çıkaralım bu soruşu», — Nikolay İvançuk nışannadı.
Deputatlar kayıl oldular cümleylän, düşünmää deyni gelän seçimnär için. Gagaziya Halk Topluşun deputatları neetlenerlär ikincilä yollandırma Moldova devletin Parlamentinä kanondakı iniţiativayı, yapılsınnar deyni diişmeklär memleketin Seçimnär kodeksına. Avtonomiyanın kanon iniţiativanın işlettirilmesinin birisi, GHT deputatı GEORGİY LEYÇU oturuşun süresindä haberledi, ani taa ileri nasaat edilmiş diişmeklär devletin Seçimnär kodeksına, ölä da alezdän bakılmaldılar. Onun laflarına görä, taa bıldırkı iyünün 25 — dä Gagauziya deputatları çıktılar iniţiativaylan, angıları dooruduluydular, ki kanoncasına Seçimnär kodeksını getirmää, bakarak «Gagaziya Baş kanonuna» hem başka norma aktlarına.
«Parlament bakamadı bu proekti o üzerä, ani geçän sozıvın vakıdı geçtiydi. Legislaturanın başarmasından sora. Proekt geeri yollandırıldı Gagauziya Halk Topluşuna bakılmadık. Bu üzerä, nasaat ederim ikincilä yollandırmaa onu Parlamentä. Düşünerim, ani erli cevaplı yaklaşarsaydı çoyu soruşlar, angıları zamndaşta çarȇrlar politik dartışmalarına seçimnerin geçirilmesindä, düşeceklär kendi kendilerinä»,- Leyçu söledi.
Taa ileri, 2025 — ci yılın kasım ayın 5 — dä MD Parlamenti saydı Gagauziya bir sıra iniţiativalarını diil dooru o üzerä, ani 11 sozivın iş vakıdı geçti. Onnarın sayısında bulundu kanon proekti da, angısı kabledildi Gagauziya Halk Topluşun deputatlarınnan 2025 — ci yılın iyün ayında. Ondan sora, nicä dokument Parlamentlan geeri yollandırıldı, o bakılmadı, çizgiledi GHT deputatı Georgiy Leyçu. «Dokument hiç bakılmadı — gramatika uurunda da hiç bişey diişmedi», haberledi temsilci. Nasaat edilmiş cümlelär koruyȇrlar kendi aktuallıını, sayȇrlar deputatlar. Laf gider hak çizgilerin yok edilmelerin lääzımnıı için, regionun seçimnerin geçirilmesindä, decez — Gagauziya seçinmär organın adı için. Коmmentariya için biz danıştık MD Parlamentin deputatına Kiriyäk İgorä, ama o kommentariya vermää hazır diildi .
Moldovanın hem Gagauziyanın en mekalı haberleri GRTnın Telegram kanalında!